ԵՐԵՎԱՆ, 14 մարտի — Sputnik. «Մարիաննա» ընկերության սեփականատիրոջ որդին՝ 26 տարեկան Ժորա Վարդանյանը, ձերբակալվել է։ Այս մասին հայտնում է shamshyan.com-ը։
Ինչպես նշված է կայքում, նա երեկ՝ մարտի 13-ին, մեղայականով ներկայացել է քննչական վարչություն և հայտնել, որ մարտի 10-ին իր վարած Mercedes G 63 մակնիշի 999 DO 99 համարանիշի ավտոմեքենայով Վազգեն Սարգսյան փողոցում՝ ՀՀ կենտրոնական բանկի դիմաց, վրաերթի է ենթարկել 75 տարեկան Մարիա Գրիգորյանին։
Կայքի տեղեկություններով՝ Երևանի 1-03 շտապօգնության բժշկական կենտրոն ահազանգել է Վարդանյանը և մինչ շտապօգնության ժամանումը փորձել է օգնել կնոջը, բայց երբ ժամանած բժիշկները հայտնել են, որ վրաերթի ենթարկվածը մահացել է, նա հեռացել է դեպքի վայրից։
«Կան նաև ականատես վկաներ, ինչպես նաև, ըստ տեղեկությունների, դեպքի վայրի հարևանությամբ տեղադրված տեսախցիկների նկարահանած կադրեր, որ նա եղել է դեպքի վայրում, սակայն իմանալով, որ վրաերթի ենթարկվածը մահացել է, հոգեբանական ճնշման տակ չի համարձակվել մոտենալ դեպքի վայր ժամանած իրավապահներին»,- նշված է հաղորդագրության մեջ։
Կայքում նշված է, որ Վարդանյանը նախկինում դատապարտված չի եղել և ակտիվ մասնակցություն է ունեցել մեծ թվով բարեգործական միջոցառումների՝ կատարելով բազմաթիվ բարեգործություններ։
