ԵՐԵՎԱՆ, 5 մարտի — Sputnik, Դավիթ Գալստյան. Հայ զինվորներն իրական փորձությունների ժամանակ իրենց ավելի լավ կդրսևորեն, քան թուրք զինվորները։ Sputnik Արմենիայի հետ զրույցում նման համոզմունք հայտնեց իսրայելցի հրապարակախոս և հասարակական գործիչ, քաղաքագետ Ավիգդոր Էսքինը։
«Սիրիայի օրինակով մենք տեսանք, որ թուրք զինվորականներն անգործունակ են։ Թուրքական բանակը միֆ է։ Այն ավելի վատն է, քան իրանական բանակը, իսկ իրանականը շատ վատն է։ Նրանք շատ վատ են կռվում, բայց միևնույն ժամանակ շատ խիզախ են. կարող են գնդակի տակ պառկել։ Իսկ թուրքերի մոտ նույնիսկ դա է բացակայում», — ասաց Էսքինը։
Նա նշեց, որ չի զարմանա, եթե իրական փորձությունների ժամանակ փոքր Հայաստանի բանակն ավելի ուժեղ լինի, քան թուրքականը։ Նրանց այսօրվա զինվորականները, Էսքինի խոսքով, «անտաղանդ են», որի մեղավորն Էրդողանն է. հենց նա է կործանել բանակը։
«Սարսափելի էր այն, ինչ նրանք անում էին Սիրիայի հյուսիսում։ Քրդերը նրանց ակտիվորեն ջախջախում են», — նշեց Էսքինը։
Մարտի 1-ին սիրիական Աֆրինում քուրդ աշխարհազորի դեմ «Ձիթենու ճյուղ» գործողությունների անցկացման ժամանակ թուրքական բանակը 8 զինվոր կորցրեց և 13 վիրավոր ունեցավ։
Ավելի վաղ փետրվարի 28-ին Թուրքիայի Գլխավոր շտաբը հայտարարեց, որ Անկարան 33 մարդ է կորցրել, ավելի քան 150 վիրավոր է եղել։ Այդպիսով, գործողությունների սկզբից, այսինքն այս տարվա հունվարից ի վեր Թուրքիան ավելի քան 40 մարդ է կորցրել, և սրանք միայն պաշտոնական տվյալներն են։
Հունվարի 20-ին Թուրքիայի ԶՈՒ Գլխավոր շտաբը հայտարարեց սիրիական Աֆրինում քուրդ զորամիավորումների դեմ սկսած «Ձիթենու ճյուղ» գործողությունների մասին։ Միաժամանակ Թուրքիայի հետ գործում են «Սիրիայի ազատ բանակի» գրոհայինները։
Դամասկոսը վճռականորեն դատապարտեց Աֆրինում Թուրքիայի գործողությունները` նշելով, որ այդ տարածքը Սիրիայի անբաժանելի մասն է։
