Արմենուհի Մխոյան, Sputnik.
Ամուր կամքի ու նվիրվածության շնորհիվ հաշմանդամություն ունեցող 20 —ամյա Միքայել Սահակյանն այսօր հասել է իր երազանքին ու իրեն երջանիկ է համարում:
Միքայելը երկու երազանք ուներ: Եթե երազանքներից մեկը՝ ընտանիք կազմելը, դեռ չի հասցրել կյանքի կոչել, բայց մյուսն իրականացրել է՝ իր, ծնողների ու իր կողքին կանգնած ու իրեն օգնության ձեռք մեկնած մարդկանց շնորհիվ: Երիտասարդ տղան արդեն մասնագիտություն ունի՝ այն էլ սիրած:
Հացթուխ է: Իր թխած հացը ոչ միայն իր ու իր ընտանիքի համար է, այլ նաև հասակակիցների ու իր նման խնդիրներ ունեցող այն երեխաների, ովքեր հաճախում են «Հայկական Կարիտաս» բարեսիրական հասարակական կազմակերպության «Էմիլի Արեգակ» կենտրոն:
Միքայելը մեկ տարի առաջ է «մտել» խոհանոց ու խոհարարական գաղտնիքները բացահայտել կենտրոնի ավագ խոհարար Անահիտ Ավդալյանի օգնությամբ:
«Եթե գնահատելու լինեմ Միքայելի հաջողություններն, ապա կարող եմ վստահաբար ասել, որ նա տիրապետում է հացթուխի մասնագիտությանը, որը վաղն իրեն կերակրելու է: Հաց թխելն ու դրանով գումար վաստակելը Միքայելի երազանքն է, որպեսզի կարողանա ծնողներին պահել և ընտանիք ստեղծել: Կարող եմ վստահ ասել, որ իր երազանքի մի մասն արդեն իրականություն է, դե իսկ մնացածի համար դեռ պետք է ճանապարհ անցնի»,- նշում է Անահիտը` հիշելով, որ Միքայելի հետ ծանոթության ժամանակ ինքը հաց էր թխում, հենց այդ պահին ալյուրի ու խմորի նկատմամբ տղայի հետաքրքրասիրությունը զգացվեց: «Անընդհատ ձեռք էր տալիս խմորին, փորձում էր ինքն էլ որևէ կերպ մասնակցություն ունենալ: Ծնողներն էդ օրը շատ մեծ դժվարությամբ նրան տուն տարան»,-հիշում Անահիտը:
Միքայելը կենտրոն այցելած բոլոր հյուրերի ասածներին գյումրեցուն հատուկ հումորով է պատասխանում` հպարտությամբ ներկայացնելով իր կարողություններն ու չմոռանալով իր թխած հացը հյուրասիրել:
Ավագ խոհարարն այսօր արդեն վստահում է Միքայելին՝ հավատացած լինելով, որ նա ոչ միայն ժամանակին կհասցնի հացը ջեռոցից հանել, այլ նաև իր մյուս բոլոր հրահանգները կատարել: «Միքայելը շատ ուշադիր է, որ հանկարծ մի բան չվառվի: Այնքան ուշադիր է, որ ես հանգիստ եմ»
Գյումրիում այսօր Միքայելին շատերը գիտեն: Գիտեն, որպես կենսախինդ ու նպատակասլաց երիտասարդի, իսկ շուտով, հավանաբար, նաև նրա պատրաստածը համտեսելու հնարավորություն կունենան. Գյումրու կենտրոնում՝ Աբովյան ճեմափողոցում, ամռանը նախատեսվում է բացել հանրապետությունում առաջին ներառական սրճարանը:
Սրճարանում աշխատելու են բացառապես հաշմանդամություն ունեցող երիտասարդներ: Նրանք տեղում և՛ թխելու են, և՛մատուցելու թարմ հաց, թխվածքներ և հենց իրենց կողմից աճեցրած խոտաբույսերից պատրաստված թեյ:
Սրճարանը հաշմանդամություն ունեցող անձանց աշխատանքում ներառմանն ու կարողությունների զարգացմանն է նպաստելու:
