ԵՐԵՎԱՆ, 28 փետրվարի — Sputnik. Հայաստանի առողջապահության նախարար Լևոն Ալթունյանը խուսափեց պատասխանել դեղերի հասանելիության մասին լրագրողների հարցերին։
Կառավարության հարցուպատասխանի ժամից առաջ նախարարը հայտնվել էր մամուլի ուշադրության կենտրոնում, քանի որ կառավարության որոշմամբ` մարտի 1-ից դեղատները իրավունք չեն ունենալու առանց դեղատոմսի վաճառել դեղերի զգալի մասը (հակավարակային, հորմոնային և կոդեին պարունակող դեղերը)։
Ի՞նչ պետք է անի մարդը, եթե երեկոյան 11-ին անսպասելի բարձրանա ճնշումը։ Կամ եթե հինգ տարեկան երեխայի ջերմությունն է բարձրացել։ Գիշերվա կեսին պետք է պոլիկլինիկա՞ վազի ստուգման համար։
Իսկ ի՞նչ պետք է անեն տարեցները և հաշմանդամները։ Նրանք մյուսներից ավելի հաճախ են դեղեր գնում։ Ինչպե՞ս հասնեն պոլիկլինիկա (հատկապես 80-ն անց մարդիկ) և բուժող բժշկի մոտ հերթ կանգնեն (իսկ դեղերի մասին նոր կարգի կիրառման դեպքում հերթերն անխուսափելի կլինեն)։ Եթե հիվանդն ի վիճակի չէ հասնել պոլիկլինիկա, պարտավո՞ր է արդյոք բժիշկն այցելել նրան։ Պոլիկլինիկայում նա անվճար է ընդունում։ Իսկ տա՞նը։
Վերջապես, ի՞նչ անեն արտասահմանցիները (այդ թվում` զբոսաշրջիկները), որոնց ինքնազգացողությունն անսպասելիորեն վատացել է։
Հիշեցնենք, որ 2017թ.-ի մայիսին վարչապետ Կարեն Կարապետյանը հանձնարարել է բարձրացնել դեղատների հասանելիությունը, այդ թվում` զբոսաշրջիկների համար` ավելացնելով շուրջօրյա դեղատների քանակը, այդ թվում` հանգստավայրերում ։ Ի՞նչ օգուտ, եթե դեղատունը բաց է, բայց դեղ հնարավոր չէ գնել։
Նախարարը նախընտրեց չպատասխանել այս հարցերին` լուռ գնալով դեպի նիստերի դահլիճ։
