ԵՐԵՎԱՆ, 28 փետրվարի — Sputnik. Հարյուրավոր մարդիկ գնում են Աստծո գերեզմանի տաճար, որը վերաբացվել է այսօր տեղի ժամանակով ժամը 04:00–ին (Երևանի ժամով 06:00–ին), հաղորդում են լրատվամիջոցները։
Տաճարի բացմանը ներկա են եղել մի քանի տասնյակ ուխտավորներ ու լրագրողներ։ Տաճարի կենտրոնի մատուռում, ուր ամփոփված է Հիսուս Քրիստոսի մարմինը, աղոթքներից հետո տասնյակ, այնուհետև հարյուրավոր ուխտավորներ ուղղվեցին դեպի տաճար։
«Այսօր` եռօրյա դադարից հետո ես կրկին բացեցի եկեղեցու դռները։ Մենք երջանիկ ենք, որ ուխավորները վերադարձան։ Շնորհակալություն բոլորին, ով օգնեց վերականգնել ստատուս քվոն», – ՌԻԱ Նովոստին մեջբերում է բանալու ժառանգական պահող, մուսուլման Վաջիխ Նուսեյբենին։
Այս աննախադեպ քայլը` տաճարի փակումը, ձեռնարկվել էր կիրակի կեսօրին, երբ Երուսաղեմի քաղաքապետարանը պահանջել էր եկեղեցուց ստանալ անշարժ գույքի որոշ տեսակների համար հարկային պարտքերն ու սկսել է բանկային հաշիվները կալանավորել։ Իշխանության տվյալներով` պարտքը մոտ 186 միլիոն դոլար է կազմում։ Քաղաքապետարանում հայտնել էին, որ խոսքը կոմերցիոն շենքերի մասին է, մասնավորապես` հյուրանոցների, կոմերցիոն շինությունների ու ծառայողական տարածքների, որոնք անկախ սեփականատիրոջից չեն ազատվում հարկերից։
Երեք եկեղեցիների (Հայ առաքելական, Կաթոլիկ և Հույն ուղղափառ եկեղեցիների) ներկայացուցիչները հրաժարվել են քաղաքապետարանին ենթարկվել ու իշխանությունների որոշման դեմ բողոքի ակցիա էին կազմակերպել:
Փետրվարի 27–ի երեկոյան հայտնի էր դարձել, որ հարկահավաքը դադարեցվել էր Իսրայելի վարչապետ Բենիամին Նաթանյահուի ու Երուսաղեմի քաղաքապետ Նիր Բարկատի համատեղ որոշմամբ։
