ԵՐԵՎԱՆ, 26 փետրվարի — Sputnik. Երուսաղեմի իշխանությունների որոշումը` եկեղեցական անշարժ գույքից հարկ գանձելու մասին, կարող է կապված լինել ԱՄՆ նախագահ Դոնալդ Թրամփի կողմից Երուսաղեմն Իսրայելի մայրաքաղաք ճանաչելու հետ։ Sputnik Արմենիայի թղթակցի հետ զրույցում նման կարծիք հայտնեց Երուսաղեմում հայկական եկեղեցու վարդապետ Էմանուել Աթաջանյանը։
Հիշեցնենք, որ անցած կիրակի հունական ուղղափառ, հայկական և կաթոլիկ եկեղեցիները համատեղ հայտարարություն են ընդունել Երուսաղեմում Աստծու գերեզմանի տաճարը փակելու մասին` ի նշան հարկ գանձելու դեմ բողոքի։ Երուսաղեմի քաղաքապետարանը վստահեցնում է, որ եկեղեցները քաղաքային բյուջեին պարտք են ընդհանուր առմամբ 186 միլիոն դոլար։
Վերոհիշյալ եկեղեցիները, ձևավորելով Սուրբ գերեզմանի եղբայրությունը, համատեղ կառավարում են քրիստոնեության մեծագույն սրբությունը, որը կառուցվել է Քրիստոսին մահապատժի ենթարկելու, թաղելու և նրա հարություն առնելու վայրում։ Եկեղեցիները հրաժարվում են ենթարկվել աշխարհիկ իշխանությունների պահանջին` նրանց գործողությունները համարելով վիրավորանք և տասնյակ տարիներ պահպանված ավանդույթների խախտում։
«Մեր եկեղեցիների վրա ճնշում գործադրելու փորձեր միշտ եղել են նաև Թրամփի հայտնի որոշումից առաջ։ Բայց հիմա այդ փորձերն ուժեղացել են։ Հավանաբար Երուսաղեմի իշխանություններին «ոգեշնչել» է ամերիկացիների մտադրությունը, ըստ որի` նրանք այս տարվա մայիսին Իսրայելի պետության ստեղծման 70-ամյակի կապակցությամբ ուզում են դեսպանատունը տեղափոխել Երուսաղեմ», — նշեց Էմաունել վարդապետը։
Նրա կարծիքով` եկեղեցական առաջնորդների բողոքը պետք է ստիպի, որ համաշխարհային հանրությունն ուշադրություն դարձնի եկեղեցիների խնդրին։
Վարդապետը նշեց, որ եկեղեցական ունեցվածքը երբեք չի հարկվել։ «Եկեղեցիները տեսել են օսմանյան տիրապետություն, հորդանանյան իրավազորություն, անգլիական մանդատ։ Օսմանյան լուծն ամենածանրն է եղել քրիստոնեական եկեղեցիների համար, բայց նույնիսկ այդ ժամանակ հարկեր չեն վճարել։ Հիմա ինչ-որ տարօրինակ ժամանակաշրջան ենք ապրում, երբ Իսրայելում ծայրահեղ աջակողմյան կուսակցությունները փորձում են թելադրել իրենց պայմանները և խաղի իրենց կանոնները` նպատակ ունենալով ճնշում գործադրել եկեղեցիների վրա», — ասաց Էմաունել վարդապետը։
Հոգևորականները վստահ են, որ այդ ամենն արվում է եկեղեցիները եկամտի աղբյուրից զրկելու, ֆինանսապես թուլացնելու և վերջնական արդյունքում նրանց Երուսաղեմից դուրս մղելու համար։
«Երուսաղեմը եղել է, կա և կլինի քրիստոնեական։ Սա աշխարհի կենտրոնն է և չի կարող համարվել մի երկրի մայրաքաղաք», — ասաց նա։
Ավելի վաղ վարդապետը հայտարարել էր ռուսական ԶԼՄ-ներին, որ Երուսաղեմի պատրիարքարաններն Աստծու գերեզմանի տաճարը բացելու կոնկրետ ժամկետներ չեն նշել։
