ԵՐԵՎԱՆ, 27 փետրվարի — Sputnik. Վերաքննիչ քրեական դատարանն այսօր մերժեց Արցախի Հանրապետության պաշտպանության բանակի նախկին հրամանատար Սամվել Բաբայանի և մյուսների դիմումը՝ առաջին ատյանի որոշումը բեկանելու մասին։
Առաջին ատյանի դատարանի որոշմամբ Սամվել Բաբայանը դատապարտվել էր 6 տարվա ազատազրկման։
Ըստ մեղադրանքի՝ նա նախնական համաձայնությամբ դրդել է մի խումբ անձանց ապօրինի կերպով ձեռք բերել «Իգլա» տեսակի դյուրակիր զենիթահռթիռային համալիր և այն փոխադրել Հայաստան: Հանցավոր ճանապարհով ստացված գույքն օրինականացնելու (փողերի լվացում), ինչպես նաև ապօրինի կերպով ռազմամթերք ձեռք բերելու, պահելու և փոխադրելու գործով 7 մեղադրյալ կար, որոնց վերաբերյալ դատարանը դատավճիռ կայացրեց 2017թ. նոյեմբերի 28-ին: Մեղադրյալները դատապարտվեցին 2-ից մինչև 6 տարվա ազատազրկման:
Այսօրվա նիստից հետո Սամվել Բաբայանի պաշտպանը հայտնեց, որ պատրաստվում են Վճռաբեկ բողոք ներկայացնել: Բաբայանի փաստաբանը մանրամասնեց, որ ներպետական վերջին ատյանում՝ Վճռաբեկ դատարանում, նույնպես մերժում ստանալու դեպքում, դիմելու են Մարդու իրավունքների եվրոպական դատարան՝ անգամ եթե Բաբայանի վրա համաներում տարածվի։
Ավելի վաղ Սամվել Բաբայանը հանդես էր եկել պաշտպանական ճառով` նշելով, որ տպավորություն է ստեղծվել, թե պետական մեղադրողն է թելադրում դատավարության ընթացքը և որ քրեական այս գործն իր դեմ պատվեր է: Սամվել Բաբայանը դատարանին հորդորել էր «կրկեսը թարգել»` հայտարարելով, որ գնալու է մինչև վերջ՝ բոլոր ատյաններով:
