ԵՐԵՎԱՆ, 4 սեպտեմբերի — Sputnik. Կենտրոն և Նոր Նորք վարչական շրջանների ընդհանուր իրավասության դատարանում շարունակվում է «Իգլայի» գործով դատական նիստը՝ դատավոր Արշակ Վարդանյանի նախագահությամբ:
Դատական նիստին տեսաձայնագրումն ու ձայնագրումն արգելելու վերաբերյալ մեղադրող դատախազի միջնորդությունը բավարարվեց մասնակիորեն։ Դատավորն ասաց, որ լրատվամիջոցներին հնարավորություն կտրվի տեսաձայնագրել հինգ րոպե, իսկ ձայնագրումը դատարանը չի սահմանափակի:
Այսօր դատական նիստին հարցաքննվեց գործով վկայի կարգավիճակ ունեցող Գառ Շաբոյանը, որի միջոցով փաստաթուղթ է ուղարկվել Մոսկվայից Երևան:
Վկան ասաց, որ դատավարության կողմերից ոչ մեկին չի ճանաչում, այդ թվում նաև ամբաստանյալներին: Նա նշեց, որ Երևան-Մոսկվա և հակառակ ուղղությամբ ուղևորափոխադրում է իրականացնում։
«Ձմռան վերջերին ինձ մեր դիսպետչերը Մոսկվայում փաստաթղթերի փաթեթ փոխանցեց և ասաց, որ Երևանում կգան կվերցնեն»,- ասաց վկան:
Վկան հայտնեց, որ փաստաթղթերը փաթեթավորված են եղել, Երևան հասնելուց հետո էլ այստեղ աշխատող դիսպետչեր Գոռը վերցրել է դրանք։
« Իգլայի» գործով անցնում է վեց ամբաստանյալ՝ Արցախի հերոս Սամվել Բաբայանը, Սանասար Գաբրիելյանը, Արմեն Պողոսյանը, Կարեն Քոչարյանը, Անդրանիկ Քոչարյանը, Ժորա Զաքարյանը և Դավիթ Հարությունյանը:
