ԵՐԵՎԱՆ, 26 փետրվարի — Sputnik. Ռաուլ Վալենբերգի հիմնադրամն անդրադարձել է Հայոց ցեղասպանության մասին բանաձևը մերժելու որոշմանը, հաղորդում է Jerusalem Post-ը։
Հիմնադրամի ներկայացուցիչները խորհրդարանի խոսնակ Յուլի Էդելշտեյնին ուղղված իրենց ուղերձում «խոր հիասթափություն» են հայտնել, որ Քնեսեթը մերժել է Հայոց ցեղասպանության մասին բանաձևը։ Նրանց կարծիքով` նման քաղաքականությունը տրամաբանական բացատրություն չունի։
«Ցավոք, վերջին տարիներին այդ հարցի շուրջ քվեարկությունները խորհրդարանում սովորական ծես են դարձել։ Ամբողջ հարգանքով հանդերձ, մենք չենք կարող հասկանալ այդ դիրքորոշումը, չխոսենք արդարացնելու մասին։ Իսրայելը հրեա ժողովրդի տունն է, որն աննկարագրելի տառապանքներ է տեսել։ Այդ տառապանքներից 25 տարի առաջ հայ ժողովուրդը սարսափելի ողբերգություն է ապրել, որի վրա աշխարհը փակել է աչքերը։ Շատերի կարծիքով` հենց այդ պասիվությունն է հանգեցրել հրեա ժողովրդի ողբերգությանը», — ասվում է հիմնադրամի պատվավոր տնօրեն Էդուարդո Էռնեկյանի և հիմնադիր Բարուհ Թենեմբաումի ուղերձում։
Հրեական պետությունը, նրանց կարծիքով, պետք է «ազնվություն և մեծահոգություն դրսևորի, որպեսզի ճանաչի հայ ժողովրդի սարսափելի ողբերգությունը»։
«Դժբախտաբար, Քնեսեթը և Իսրայելի պետությունը բազմիցս կորցրել են իրենց հնարավորությունը։ Եվ ոչ մի քաղաքական իրողություն չի կարող արդարացնել դա», — պնդում են խնդրագրի հեղինակները։
Նրանք նաև նշում են, որ Երկրորդ համաշխարհային պատերազմի տարիներին շատ հայեր իրենց կյանքը վտանգել են հրեաներին նացիստական դահիճներից փրկելու համար։ Ավելին, 24 հայեր արժանացել են «Խաղաղության նահատակ» պատվավոր կոչման։ Փոքր ժողովրդի համար դա շատ լուրջ թիվ է։
Հիշեցնենք, որ Վալենբերգի հիմնադրամն իր անվանումը ստացել է ի պատիվ ականավոր շվեդ դիվանագետի, որը Երկրորդ համաշխարհային պատերազմի տարիներին տասնյակ հազարավոր հրեաներ է փրկել նացիստական հետապնդումից։ Հիմնադրամի պատվավոր անդամներ են ավելի քան 60 պետությունների ղեկավարներ և Նոբելյան մրցանակի 50 դափնեկիրներ։
Փետրվարի 14-ին Իսրայելի խորհրդարանը մերժել է Հայոց ցեղասպանությունը ճանաչելու օրինագիծը, որին սատարել էր «Եշ Ատիդ» կուսակցության առաջնորդ Յաիր Լապիդը։ Օրինագիծը հիմնավորվել էր հին և բոլորին վաղուց հայտնի թեմայով. հրեա ժողովուրդը, որը նման ողբերգություն է ապրել, պետք է հասկանա մյուս ժողովուրդների նույնանման ողբերգությունները։ Չի կարելի մոռանալ դրանց մասին, քանի որ հղի է հետևանքներով կամ նույնպիսի ողբերգություններով մյուս ժողովուրդների համար։ Կառավարության և խորհրդարանական մեծամասնության դիրքորոշումը հանգում է նրան, որ թե՛ ՄԱԿ-ը, թե՛ ԱՄՆ-ն և մի շարք երկրներ այն ցեղասպանություն չեն անվանում։ Իսրայելն այդ համընդհանուր միտման հունի մեջ է, ուստի նա չպետք է առաջ ընկնի։
