ԵՐԵՎԱՆ, 22 փետրվարի — Sputnik. Իսրայելի խորհրդարանը չի ճանաչել Հայոց ցեղասպանությունը. դա ոչ այլ ինչ է, քան երեսպաշտություն։ Այդ մասին գրում է Prawda Obiektywna լեհական պարբերականը։
«Արդեն երկար տարիներ է վիճաբանություն է գնում Երկրորդ համաշխարհային պատերազմի տարիներին լեհերի և հրեաների հարաբերությունների մասին։ Իսրայելի մի շարք քաղաքական գործիչներ քննադատում են մեր իշխանություններին Ազգային հիշողության (նացիստների հանցագործություններում Լեհաստանի և լեհերի մասնակցության մասին անհիմն մեղադրանքների դեմ) օրենքը թարմացնելու համար։ Սակայն Իսրայելը մոռանում է, որ ինքը չի ճանաչել Հայոց ցեղասպանությունը, բայց անամոթաբար մեղադրում է լեհերին», – Twitter–ի իր էջում գրել է հայկական ծագում ունեցող լեհ քահանա Թադեուշ Իսակովիչ–Զալեսկին։
Իսրայելի շարունակական ժխտողականության մասին գրում է նաև Il Messaggero իտալական պարբերականը։
«Բավական է հիշել, որ Հայոց ցեղասպանությունից օրինակ էր վերցնում Հիտլերը` մանրամասն ծրագրելով Հոլոքոստը», – նշում է պարբերականը։
Հոդվածում մեջբերվում է Իսրայելի փոխարտգործնախարար Ցիպի Խոտովելիի խոսքերը. Իսրայելը պաշտոնական դիրքորոշում չի ընդունի Հայոց ցեղասպանության վերաբերյալ` «հաշվի առնելով խնդրի բարդությունն ու նրա դիվանագիտական ենթատեքստը»։
2015 թվականին Իսրայելի նախագահ Ռոյվեն Ռիվլին, Երուսաղեմի իր նստավայրում ցեղասպանության հիշատակի միջոցառում էր անցկացրել։ Այն ժամանակ նա հայտարարել էր, որ հայերը ժամանակակից զանգվածային կոտորածի առաջին զոհը դարձան, թեև չէր օգտագործել իր խոսքում «ցեղասպանություն» եզրույթը։ Եվ ոչ միայն Թուրքերի հետ հարաբերությունները չփչացնելու պատճառով, այլ նաև, որպեսզի Հոլոքոստը բացառիկ լինելուց չզրկի։
Խորհրդանշական է Իսրայելի ներկայիս արտգործնախարար Շիմոն Պերեսի հայտարարությունը։ «Ոչինչ չի կարող համեմատվել հրեաների Հոլոքոստի հետ»։
Սակայն բանավեճը երկար տարիներ շարունակվում է։ Ճանաչման մասին օրինագծին աջակցել է «Եշ Ատիդ» կուսակցությունը, ինչպես նաև մի շարք կազմակերպություններ. «Լիգան ընդդեմ զրպարտության» և «Հուդաիզմի բարեփոխումների միություն»։
Հայոց ցեղասպանությունը չի ճանաչել նաև ԱՄՆ նախագահ Դոնալդ Թրամփը` անկախ հայկական համայնքին տված խոստումներից։ Մասամբ, որպեսզի չվիճի Թուրքիայի հետ։ Եվ մասամբ, Ատլանտիկայի այն կողմում ուժեղ հրեական լոբբիի դեմ չգնալու համար, նշում է պարբերականը։
