ԵՐԵՎԱՆ, 24 փետրվարի — Sputnik. Թուրքիայի բնակիչների տոհմածառը կազմող առցանց հարթակը վերագործարկումից հետո սկսել է խափանումներով աշխատել, Sputnik Արմենիային ասաց թուրքագետ Սաթենիկ Պետրոսյանը։
Մոտ երկու շաբաթ առաջ Թուրքիայի հանրային ծառայությունների կայքում սկսել էր գործել նոր հավելված, որի օգնությամբ երկրի քաղաքացիները կարողանում էին վերականգնել իրենց տոհմածառը` համակարգում մուտքագրելով անունը, ազգանունն ու ծննդյան տարեթիվը։
Պետրոսյանի խոսքով` հավելվածի մեկնարկից առաջ արդեն իրարանցում էր նկատվել լրատվամիջոցներում ու սոցիալական կայքերում։ Մարդիկ նախկինում էլ են ուզել իրենց նախնիների մասին տեղեկություն ստանալ, իբր հենց այդ հանգամանք է պատճառ դարձել, որ նման հավելված գործարկվի։
«Հաջորդ օրն իսկ սոցիալական կայքերում բազմաթիվ հրապարակումներ հայտնվեցին հայկական ու քրդական ծագման մասին։ Հենց հայկական արմատների բացահայտումն է ապշեցրել Թուրքիայի բնակիչներից շատերին», — ասաց Պետրոսյանը։
Հետաքրքիր է, որ հավելվածի աշխատանքը ժամանակավոր դադարեցրին, իսկ հետո այն լրիվ այլ կերպ սկսեց աշխատել։
«Վերագործարկումից հետո տեղեկության մեծ մասն աղավաղվել է։ Օգտատերերը նկատում են, որ ծրագիրն այլևս այն չէ։ Լինում են դեպքեր, երբ համակարգը ցույց է տալիս, որ 1800-ականներին ծնված մարդիկ ողջ են»,- ասաց Պետրոսյանը։
Հնարավոր է` ծառայության այդօրինակ «պահվածքը» պայմանավորված է այն հանգամանքով, որ ծրագրի ստեղծողներն ուզում են անվստահություն ներշնչել ծրագրի սկզբնական արդյունքների նկատմամբ։
Ինչ վերաբերում է հասարակության արձագանքին, ապա իրենց հայկական, քրդական, հունական ծագումից ցնցվել են ոչ միայն իշխանության կողմնակիցները, այլև ընդդիմության ներկայացուցիչները, ինչն արտացոլվում է լրատվամիջոցներում։
«Նրանց համար էլ է հայ, հույն կամ քուրդ լինելը հաճախ վիրավորանք ընկալվում», — ասաց Պետրոսյանը։
Ընդհանուր առմամբ, նրա խոսքով, Թուրքիայում իրավիճակը սրվել է, հատկապես վերջերս ազգայնական տրամադրությունների ուժեղացման ֆոնին։
