Փորձագետի խոսքով` Թրամփն արդեն որերորդ անգամ հակասում է ինքն իրեն։ Մինչ երկրի նախագահ ընտրվելը նա ուշագրավ հայտարարություններ էր անում, որոնցից մեկն էլ վերաբերում էր Ռուսաստանի հետ հարաբերությունները լավացնելուն։ Ընտրվելուց հետո նա դարձավ հսկայական ճնշումների զոհ, և նրան ստիպեցին, որ հակառուսական քաղաքականություն վարի։
«Ելնելով այդ իրավիճակից ու վերլուծությունից` կարող եմ ասել, որ այս հայտարարությունը պետք է դիտարկել որպես մի մեսիջ` ուղղված ներքին քաղաքական էլիտային։ Այս հայտարարությունն ինձ հիշեցնում է Ալիևի վարած ներքին քաղաքականությունը»,- նշեց Բոշյանը։
Նրա խոսքով` հարց է ծագում, թե ինչու է Թրամփը նման հայտարարություն անում, այն դեպքում, որ իրանական և ռուսական զորքերը օրինական են գտնվում Սիրիայում և վարում են ոչ միայն այդ երկրի, այլև սեփական շահերի պաշտպանության քաղաքականություն։
«Մեծ հարց է`ԱՄՆ-ն որքա՞ն իրավունք ունի գտնվելու օվկիանոսից այս կողմ։ Միացյալ Նահանգներն ամբողջ մոլորակն է հայտարարել իր շահերի գոտի, ինչը նոնսենս է»,- ասաց փորձագետը։
Նշենք, որ Միացյալ Նահանգների նախագահ Դոնալդ Թրամփը հայտարարել է, որ Ռուսաստանն Իրանի ու սիրիական իշխանությունների հետ միասին պատասխանատվություն է կրում Սիրիայում մարդասիրական ճգնաժամի համար։ Նա նշել է` այն, ինչ արեցին վերջերս Ռուսաստանը, Իրանն ու Սիրիան, խայտառակություն է։
