ԵՐԵՎԱՆ, 23 փետրվարի — Sputnik. Հարավային Կովկասի զարգացման բանալին գտնվում է Նախիջևանում, այսօր լրագրողներին ասաց «Նորավանք» գիտակրթական հիմնադրամի փոխտնօրեն, էներգետիկայի հարցերով ՄԱԿ-ի ազգային փորձագետ Արա Մարջանյանը։ Նրա խոսքով՝ գաղտնիք չէ, որ Հայաստանն արդեն 25 տարի գտնվում է շրջափակման մեջ Թուրքիայի և Ադրբեջանի կողմից։ Ճնշումը պարբերաբար ուժեղանում է, նպատակն է առավելագույն չափով հյուծել Հայաստանը։ Նախիջևանն այդ ճնշման օղակներից է։
«Նախիջևանում տեղի ունեցող իրադարձությունները չեն կարող չանհանգստացնել։ Դրանք գտնվում են հայ մասնագետների ուշադրության կենտրոնում։ Անուշադրության չի մատնվել ո՛չ հարձակողական զենքի կենտրոնացումը (օրինակ` թուրքական համազարկային կրակի ռեակտիվ համակարգի կամ խոշոր տրամաչափերի հրետանու), ո՛չ արբանյակների կառավարման պահեստային կենտրոնի ստեղծումը», — ասաց Մարջանյանը։
Նրա խոսքով՝ Նախիջևանում կենտրոնացված է լուրջ հարձակողական ներուժ, բայց պետք է հստակ արձանագրել, որ Հայաստանն ի զորու է ցանկացած պահի չեզոքացնել այդ ուժերը։ Սակայն չի կարելի կորցնել զգոնությունը։
Մարջանյանի կարծիքով՝ Նախիջևանի շուրջ տեղի ունեցող գործընթացները պետք է դիտարկել ԱՄՆ-ի և Ռուսաստանի հակազդեցության սրման, ինչպես նաև Թուրքիայի վարած քաղաքականության հետևանք։
«Գաղտնիք չէ, որ որոշակի ուժերի նպատակը Ռուսաստանի մատույցներում մշտապես լարվածություն պահելն է․ լինի դա Ուկրաինան, Հարավային Կովկասը կամ Մերձդնեստրը», — ասաց Մարջանյանը։
Բացի այդ, Թուրքիայի և Ադրբեջանի իշխանությունները երբեք չեն հրաժարվել Մեծ Թուրանի գաղափարից, որի մի մասը պետք է լինի Նախիջևանը։
Այդ ամենն ուղեկցվում է տարբեր միջազգային աղբյուրների մշտական հաղորդագրություններով, թե Արցախում հնարավոր է նոր պատերազմ։
«Դրան պետք է հակադրել խաղաղության և զարգացման սցենարներով։ Ցույց տալ ժողովուրդներին, որոնք դարձել են Ադրբեջանի ռազմատենչ հայտարարությունների գերին, որ պատերազմն անխուսափելի չէ։ Այդ ամենին պետք է հակադրել զարգացման սցենարը», — ասաց Մարջանյանը։
Նրա խոսքով՝ Նախիջևանն` իր աշխարհագրական դիրքի շնորհիվ կարող է լուրջ դեր խաղալ տարածաշրջանում ։
«Նախիջևանը կարող է դառնալ ամբողջ տարածաշրջանը բացող բանալին։ Չպետք է մոռանալ, որ երկաթուղին, էներգետիկ մայրուղիները Հայաստանի և Նախիջևանի տարածքով անցել են Թուրքիայի և Իրանի կողմը», — ասաց Մարջանյանը։
Նա նշեց, որ նույնիսկ 19-րդ դարում Siemens ընկերությունն առաջին հեռագրային մալուխն անցկացրել է այդ երթուղով։ Եթե քանդել այս թնջուկը, ապա դրա կիրառումը կնպաստի տարածաշրջանի բոլոր ժողովուրդների բարգավաճմանը և զարգացմանը։ Մարջանյանի խոսքով՝ այդ գաղափարը պետք է տարածել տարածաշրջանի հասարակությունների շարքում, քանի որ Ադրբեջանի իշխանությունները բոլորովին այլ քաղաքականություն են վարում։
