ԵՐԵՎԱՆ, 22 փետրվարի — Sputnik. Լիբանանի հայկական սփյուռքն ամեն ինչ կանի, որպեսզի լիբանանցիների մեջ սեր սերմանի Հայաստանի նկատմամբ, Երևանում լրագրողներին ասաց երկրի զբոսաշրջության նախարար Ավետիս Կիտանյանը։
Կիտանյանը Հայաստան է ժամանել Լիբանանի նախագահ Միշել Աունի պատվիրակության կազմում։
Լիբանանցի նախարարի կարծիքով` երկրի կառավարությունում և խորհրդարանում հայերի առկայությունը պետք է նպաստի երկրների բացառիկ հարաբերությունների հաստատմանը։
«Լիբանանում մենք մեզ զգում ենք որպես այդ երկրի քաղաքացիներ, բայց երբեք չենք մոռանում մեր հայկական արմատների մասին», — ասաց Կիտանյանը։
Նրա խոսքով` տարվա չորս ամիսների ընթացքում Լիբանանից Հայաստան ուղիղ չվերթեր են իրականացվում ։ 2017թ-ին Հայաստանից Լիբանան մեկնած զբոսաշրջիկների թիվը գերազանցել է 11 հազարը։ Լիբանանից Երևան են գալիս ոչ միայն հայերը, այլև լիբանանցիները։
«Լիբանանցիներին հետաքրքրում է Հայաստանը, հատկապես նրանց գրավում է կրոնական զբոսաշրջությունը։ Լիբանանն ունի լողափեր, իսկ Հայաստանը` այլ հնարավորություններ, մնում է, որ մարդիկ օգտվեն դրանից», — ասաց Կիտանյանը։
Նրա խոսքով` լիբանանցիները Հայաստանը սիրում են հայկական համայնքի շնորհիվ։
«Մենք լիբանանցիներին այնպես ենք ներկայացնում Հայաստանը, որ նրանք ցանկանում են այցելել երկիր», — ասաց Կիտանյանը։
Տարբեր հաշվարկներով` Լիբանանի հայ համայնքը 150 հազարի է հասնում։ Լիբանանահայերը բնակվում են հիմնականում Բեյրութում, ինչպես նաև երկրի հյուսիսային շրջաններում։ Բեյրութի Բուրջ Համուդ հայկական թաղամասը հիմնել են հայերը` փրկվելով 1915թ-ի Հայոց ցեղասպանությունից և ապաստան գտնելով Լիբանանում։
Հենց այստեղ է գտնվում Մեծի տանն Կիլիկիո կաթողիկոս Արամ I-ի նստավայրը։ Երկրում հայկական 25 ուսումնակրթական հաստատություններ են գործում, այդ թվում` բարձրագույն ուսումնական հաստատություններ և մանկապարտեզներ։
