ԵՐԵՎԱՆ, 22 նոյեմբերի — Sputnik. Հարևան արաբները մի շարք առասպելներ ունեն հայերի մասին, որոնց վրա վերջիններս անկեղծորեն ծիծաղում են։ Լիբանանի Stepfeed պարբերականը տեղի հայերի շրջանում հարցում է անցկացրել և պարզել, թե նրանց հետ կապված ինչ կարծրատիպեր կան (պարզվել է, որ դրանք քիչ չեն)։
Լիբանանում ուր էլ գնաս, ավանդույթների, ուտեստների և լեզուների միաձուլման կհանդիպես։ Եվ գրեթե յուրաքանչյուր արաբ անմիջապես կարող է ցույց տալ այն վայրերը, որտեղ հայեր կան, և յուրաքանչյուր արաբ կպատմի, թե ինչ են սիրում ուտել հայերը։ Ոմանք նույնիսկ ցույց կտան, թե ինչպես են նրանք վիճում։ Հարմոն, գլխարկ, ձյուն և Vodka… Նման «ջենթլմենական հավաքածու» կա նաև հայերի համար։ Հայերը սովորել են և չեն նեղանում։
1. «Ես նույնիսկ մտածել չէի կարող, որ դուք արաբերեն եք խոսում»։
«Սիրիայում, Եգիպտոսում, Իրաքում եմ ապրել, այժմ բնակվում եմ Լիբանանում։ Հավանաբար լեզուն ավելի լավ գիտեմ, քան լիբանանցիների կեսը», — պատասխանում է Կարոլինա Բակեջյանը։
2. «Որտե՞ղ է ավելի լավ` Հայաստանու՞մ, թե՞ Լիբանանում»։
Այդ հարցը նոր թափ ստացավ, երբ Լիբանանի զբոսաշրջության նախարար Ավետիս Կիտանյանը հայտարարեց, որ Հայաստանում է ավելի լավ։
«Իսկ ինչո՞ւ է պետք ընտրություն կատարել։ Մենք սիրում ենք Լիբանանը և սիրում ենք Հայաստանը։ Պետք չէ մտածել, թե մենք էլ ենք նախարարի պես մտածում», — ասում է Կարոտ Համբուրյանը (18 տարեկան)։
3. «Բաստուրմա շատ եք սիրում, չէ՞»։
«Ինչպես ես, այնպես էլ ամուսինս բաստուրմա չենք սիրում։ Ու ոչ բոլոր հայերն են սիրում, ճիշտ այնպես, ինչպես և ոչ բոլոր հայերն են սիրում թաբուլե», — պատասխանում է Անահիտ Սիսլյանը։
4. «Իսկ ես կարող եմ հայհոյել հայերենով»։
«Ինչ ես ասում։ Գուցե քեզ մեդա՞լ է պետք տալ։ Ճիշտ է` խոսքերի կեսը խառնեցիր։ Բայց, ապրես, ջանացիր», — կատակում է 29-ամյա Րաֆֆի Հալաջյանը։
5. «Հավանաբար ճանաչում եք Բուրջ Համուդի Սաքոյին։ Նա նաև մոտոցիկլետ ունի»։
«Ո՞ր Սաքոյին։ Իմ հարազատ եղբորս, թե՞ հորեղբորս տղային։ Թե՞ հորաքրոջս փեսայի զարմիկին։ Սաքո անունով հային փնտրելը նույնն է, ինչ Մուհամմեդ անունով արաբ-մուսուլմանին կամ Միշել անունով քրիստոնյային», — պատասխանում է ուսանող Վահե Համբուրյանը։
