ԵՐԵՎԱՆ, 20 փետրվարի — Sputnik. Փետրվարի 17-ին «Գյումրի» բժշկական կենտրոնում բժիշկների միջև ծեծկռտուքի պատճառը հիվանդն է եղել։ Բժիշկներն իրար ծեծել են հիվանդին իրարից խլելու պատճառով։ Այս մասին, վկայակոչելով հիվանդանոցի տնօրենի խոսքը, գրում է «Իրավունքը»։
Ըստ թերթի` բժիշկներ Կարեն Գրիգորյանը և Արթուր Նասիբյանը վիճաբանել են նույն հիվանդանոցի բժիշկներ Արման և Արտակ Սարգսյանների հետ: Արդյունքում՝ բժիշկներից մեկը մարմնական վնասվածքներ է ստացել: Միաժամանակ՝ 35-ամյա բուժքույր Աննա Ադամյանը Ոստիկանությանը հայտնել է, որ վիճաբանության ժամանակ եղբայրներ Նասիբյանները ոտքերով հարվածել են իր աշխատասեղանին և մոտ 10 րոպեից ավել սեռական բնույթի հայհոյանքներ տվել իր հասցեին:
Թե ինչն էր խուլիգանությամբ համեմված բժիշկների ծեծկռտուքի պատճառը, թերթի հետ զրույցում Գյումրիի բժշկական կենտրոնի տնօրենը խուսափել է հստակ պարզաբանումներից, բայց ասել է. «Իրականությունը լրիվ այլ է, մամուլում ներկայացվածը գույնզգույն է: Իրականում՝ հիվանդի պատճառով իրար չեն հասկացել: Մեկը մի հիվանդի բուժել է, հետո՝ նույն հիվանդը գնացել է մյուսի մոտ»։
Հիշեցնենք, փետրվարի 17-ին, ոստիկանության Կումայրիի բաժին տեղեկություն է ստացվել, որ նույն օրը, ժամը 11։00-ի սահմաններում «Գյումրի» բժշկական կենտրոնում բժիշկներ Կարեն Գրիգորյանը և Արթուր Նասիբյանը վիճաբանել են նույն հիվանդանոցի բժիշկներ Արման և Արտակ Սարգսյանների հետ, ինչից հետո վերջիններս ծեծի են ենթարկել նրանցից մեկին, ով ստացել է մարմնական վնասվածքներ։
