ԵՐԵՎԱՆ, 19 փետրվարի — Sputnik. Հայ դպրոցականների թիմը լրացված իրականության (AR) իր ծրագիրն առցանց խանութներում կտեղադրի։ Այնտեղ, որտեղ ձեր հեռախոսի տեսախցիկը հազար դրամանոց թղթադրամ նկատի, ծրագիրն էկրանին կբերի ԱՄՆ նախագահի կարմիր փողկապն ու ցորենագույն մազերը։
Ծրագրի հեղինակները Վիգենն ու Արմանն են` Երևանից մոտ մեկ ժամ հեռավորության վրա գտնվող Թալին քաղաքի դպրոցականները։ Քաղաքի վարժարաններից մեկում նրանք հաճախում են «Արմաթ» լաբորատորիա։ Նման լաբորատորիաներում Երևանից մինչև ամենահեռավոր գյուղերի դպրոցականները յուրացնում են ծրագրավորողի և ինժեների հմտությունները։ Այդ լաբորատորիաները ստեղծում է Հայաստանի ինֆորմացիոն տեխնոլոգիաների ձեռնարկությունների միությունը (UITE)։
Վիգենը 10-րդ դասարանի աշակերտ է, Արմանը` 9-րդ դասարանի, այսինքն միջին դպրոցից վարժարան կտեղափոխվի եկող տարի, բայց մաթեմատիկայի և ծրագրավորման ոլորտում նա 10-րդ դասարանցիներին հավասար գիտելիքներ ունի։ Նրանք երկուսով ստեղծել են Zoomar ստարթափ թիմը, որի ղեկավարը Եղիշե Ամիրյանն է։ Նա պարապմունքներ է անցկացնում «Արմաթում», օգնում է տղաներին ոչ միայն տեխնիկապես, այլև փորձում է նրանց հետ վարժեցնել գիշերն աշխատելու վատ սովորությունից։
Արմանն ու Վիգենն իրենց ծրագրում ընդգրկել են պատկերների երկու բազա` ելակետային (իրական կյանքից) և լրացուցիչ։ Այնուհետև դրանք կապել են ծրագրի հիշողության մեջ։ Այժմ, եթե հեռախոսի տեսախցիկը հազար դրամանոց թղթադրամ նկատի, ծրագիրը հեռախոսի էկրանին կբերի Թրամփի եռաչափ պատկերը։ Նրա հետ այժմ կարելի է նույնիսկ լուսանկարվել։
Այլ առարկաների վրա ծրագիրն այլ պատկերներ է ցույց տալիս, սակայն տեսականորեն ծրագրի հիշողության մեջ կարելի է զետեղել ինչ ուզես։
Ծրագիրն աշխատում է հայկական Arloopa (հայտնի է արդեն նաև արտերկրում) ընկերության ծրագրի սխեմայով։ Հենց այս ընկերության մասնագետներն են աջակցել տղաներին` հիշելով, թե ինչպիսի անհանգիստ դպրոցականներ են եղել նաև իրենք։ Իսկ ալգորիթմի համար Արմանն ու Վիգենը կիրառել են վիրտուալ իրականության հայտնի հարթակներից մեկը։
«Մենք ուզում ենք, որ մեր ծրագիրը նաև կիրառական նպատակներ ունենա։ Օրինակ` կարելի է տան գծագիր վերբեռնել կամ բնակարանի այն պատկերը, որն ուզում եք տեսնել վերանորոգումից հետո», — ասում է Արմանը։
Տղաներն ուզում են մի քանի օրից իրենց ծրագիրը տեղադրել AppStore կամ GooglePlay հավելվածներում։ Իսկ հաջորդ շաբաթ Թալինի վարժարանում Արագածոտնի մարզի դպրոցական ՏՏ-թիմերի ցուցահանդես կանցկացվի։
Նախագծին և ցուցահանդեսին աջակցում է World Vision բարեգործական ընկերությունը։
