ԵՐԵՎԱՆ, 14 փետրվարի — Sputnik. ԱՄՆ-ն կարող է ձգտել Արցախում լայնածավալ հակամարտության։ Sputnik Արմենիայի թղթակցի հետ զրույցում նման կարծիք հայտնեց քաղաքական և ռազմական վերլուծության ինստիտուտի փոխտնօրեն Ալեքսանդր Խրամչիխինը` մեկնաբանելով ԱՄՆ-ի ազգային հետախուզության զեկույցը։
ԱՄՆ ազգային հետախուզության տնօրեն Դենիել Քոութսի` փետրվարի 13-ին հրապարակված զեկույցում ասվում է, որ Լեռնային Ղարաբաղի շուրջ ստեղծված լարվածությունը կարող է Հայաստանի և Ադրբեջանի միջև լայնածավալ ռազմական հակամարտության վերածվել, որում ամենայն հավանականությամբ կներգրավվի Ռուսաստանը իր տարածաշրջանային դաշնակցին աջակցելու համար։
«Արցախում ռազմական գործողությունների վերսկսման վերաբերյալ բազմիցս ասել եմ, որ վաղ թե ուշ դա լինելու է։ Թե երբ` չեմ կարող կանխագուշակել», — ասաց Խրամչիխինը։
Ինչ վերաբերում է ԱՄՆ ազգային հետախուզության զեկույցին, փորձագետի խոսքով` ամերիկացիները գիտեն` ինչ են ուզում։
«Եթե խոսենք պատերազմի վերսկսման օրվա մասին, ապա ցանկացած օրվա համար կարելի է նման կանխատեսում անել։ Իսկ զեկույցում թերևս արտահայտված է ամերիկացիների ձգտումը։ ես դա կարող եմ ենթադրել», — ասաց Խրամչիխինը։
Նրա խոսքով` դա վերաբերում է նաև արցախյան հակամարտության մեջ Ռուսաստանի ներգրավմանը։
ԱՄՆ ազգային հետախուզության տվյալների համաձայն` փոխհամաձայնության ցանկության բացակայությունը կողմերի մոտ, աճող ներքին ճնշումը, Ադրբեջանի ռազմական ներուժի արդիականացումը, ինչպես նաև Հայաստանի կողմից ռուսական նոր զենք գնելու փաստը կարող են հանգեցնել 2018 թվականին լայնածավալ ռազմական գործողությունների վերսկսմանը։
