ԵՐԵՎԱՆ, 8 փետրվարի – Sputnik. Հայաստանում կանանց շրջանում այսօր էլ ուռուցքային հիվանդություններից ամենաշատը տարածված է կրծքագեղձի քաղցկեղը։
Այս մասին Sputnik Արմենիայի մուլտիմեդիոն մամուլի կենտրոնում տեղի ունեցած Երևան-Տալլին-Մինսկ-Բիշքեկ– Քիշինև տեսակամուրջի ժամանակ ասաց Հայ-ամերիկյան առողջության կենտրոնի ճառագայթային ախտորոշման բաժանմունքի վարիչ, բ.գ.թ. Հովհաննես Վարդևանյանը:
«Հայաստանի կանանց շրջանում առավել տարածված է կրծքագեղձի, արգանդի վզիկի ու հաստ աղիքի քաղցկեղը», – ասաց Վարդևանյանը։
Նրա խոսքով` տղամարդկանց շրջանում առավել տարածված է թոքերի քաղցկեղը։ Մասնագետը դա կապում է Հայաստանում ծխելու սովորության մեծ տարածվածության հետ։ Տղամարդկանց շրջանում տարածված են նաև շագանակագեղձի և հաստ աղիքի քաղցկեղները։
Փորձագետը նշեց` մեզանում տարբեր տեսակի, մասնավորապես` կրծքագեղձի ու հաստ աղիքի քաղցկեղները վաղ շրջանում հայտնաբերելու պետական ծրագրեր չկան։ Այդպիսի հետազոտություն կարելի է անցնել թերևս միայն մասնավոր հիվանդանոցներում` այն էլ մեծ գումարներ վճարելով։
Մասնավոր հիվանդանոցում, որտեղ աշխատում է Վարդևանյանը, ամեն օր մոտ 200 կին կրծքի քաղցկեղի հետազոտություն են անցնում։ Միակ բանը, որը քիչ թե շատ սփոփում է փորձագետին, Երևանում և մարզերում բացվող հոսպիսներն են։
«Հոսպիսները փոխում են կյանքի որակը, հիվանդների բարեկամներն ու մտերիմները դրական են վերաբերվում դրանց գոյությանը», – ասաց Վարդևանյանը։
«Ես, որպես բժիշկ, պատվաստումը դրական եմ համարում` հաշվի առնելով արգանդի վզիկի քաղցկեղի տարածվածությունը», – ասաց Վարդևանյանը։
Վերջին տարիներին Հայաստանում նաև վահանաձև գեղձի քաղցկեղի աճ է նկատվում` հատկապես երիտասարդների շրջանում։ Հիմնականում այն ախտահարում է 20-30 տարեկաններին։
Հայաստանի, Բելառուսի և տեսակապի մասնակից այլ երկրների փորձագետների կարծիքով` քաղցկեղային հիվանդությունների աճը պայմանավորված է համատարած սթրեսներով, սխալ, քաղցկեղածին սնունդ օգտագործելով, անառողջ ապրելակերպով։
