ԵՐԵՎԱՆ, 8 փետրվարի — Sputnik. Թուրքիայում ապրող ադրբեջանցի քրեական հեղինակությունը զբաղվում է Ուկրաինայում բնակվող իր հայրենակիցների, ինչպես նաև հայերի և այլ ազգի ներկայացուցիչ գործարարների առևանգմամբ` նրանց ազատելու համար փրկագին պահանջելով բիթքոիններով։ Այս մասին Realist–ին տված հարցազրույցում տեղեկացրել է Ուկրաինայի ազգային ոստիկանության ղեկավարի առաջին տեղակալ Վյաչեսլավ Աբրոսկինը։
««Գուլի Լոտու» (Նադիր Սալիֆով) անունով գողն ավելի քան 25 տարի անցկացրել է Ադրբեջանի կալանավայրերում։ Նա ազատազրկված է եղել 1995 թվականին, իսկ 2017 թվականին վաղաժամկետ ազատ է արձակվել։ Այժմ ապրում է Թուրքիայում։ Նա հետխորհրդային տարածքում ամենադաժան հանցագործներից մեկն է։ Այդ մարդն անգամ բանտում էր մարդկանց առևանգում։ Նա այսպես կոչված «սամիթային պատերազմ» է սկսել»,– պատմել է Աբրոսկինը։
Նրա խոսքով` «Գուլին» Ռուսաստանում և այլ երկրներում իսկական պատերազմ է սկսել սամիթի, մաղադանոսի և այլ ապրանքների շուկաների վերահսկողությունը ստանձնելու համար։ Այդ նպատակով նրա հրամանով մարդկանց էին սպանում, գնդակահարում այնքան ժամանակ, մինչև նա ի վերջո հասավ իր նպատակին։
«Մեզ մոտ նա նույնպես հանցավոր գործունեություն է իրականացնում։ Արդեն բանջարեղենի շուկայում առևտրով զբաղվող ադրբեջանցիների, հայերի և այլ էթնիկ խմբերի ներկայացուցիչ գործարարների առևանգման բազմաթիվ դեպքեր են գրանցվել։ Այդ գողը, Թուրքիայում նստած, մարդկանց առևանգում է կազմակերպում և նրանց ազատ արձակելու համար փրկագին պահանջում բիթքոիններով», – նշել է Աբրոսկինը։
Ըստ նրա` խոսքը 10 կամ 100 հազար դոլար փրկագին վճարելու մասին չէ։ Նա միլիոններ է պահանջում…
Բարձրաստիճան ոստիկանի կարծիքով` նրա ծրագրերում ոչ միայն սննդամթերքի շուկայում լիիրավ ազդեցություն ձեռք բերելն է, նա նաև ուզում է Ուկրաինայում իր կլանները ստեղծել, որոնց շնորհիվ իր ձեռքը կվերցնի հանցագործ աշխահի իշխանությունը։
Ներկա պահին կազմակերպված հանցավորության դեմ պայքարի հատուկ ստորաբաժանում ստեղծելու աշխատանքներ են ընթանում, ստորաբաժանումը կգործի կազմակերպված հանցավորության դեմ պայքարի վարչության փոխարեն։ Աբրոսկինն ընդգծել է, որ գլխավոր խնդիրը քրեական հեղինակություններին մեղադրելու համար ապացուցողական թույլ բազա ունենալն է։ Այդ նպատակով գերատեսչության աշխատակիցները որպես յուրային կընդգրկվեն այդ խմբավորումներում և կկարողանան տեղեկատվություն տրամադրել։
