ԵՐԵՎԱՆ, 7 փետրվարի — Sputnik. «Մանչեսթեր Յունայթեդի» հարձակվող Ալեքսիս Սանչեսը չի վճարել հարկերը։ Այս մասին հայտնում է Goal-ը։
Ըստ տեղեկությունների` չիլիացի ֆուտբոլիստը 2012-2013 թվականներին, երբ խաղացել է «Բարսելոնայում», չի վճարել մեկ միլիոն եվրոյի հասնող հարկերը։
Իսպանիայի դատարանի որոշմամբ նա դատապարտվել է 16 ամսվա ազատազրկման, սակայն կխուսափի բանտարկությունից, քանի որ համաձայնել է բացի հարկերից վճարել նաև տոկոսները։
Վերջերս Լոնդոնի «Արսենալից» «Մանչեսթեր Յունայթեդ» տեղափոխված Սանչեսը խոստովանել է, որ իր իմիջային իրավունքների վաճառքի վերաբերյալ ֆինանսական տեղեկությունները թաքցրել է արտասահմանյան 2 ընկերության միջոցով։
Նշենք, որ Հայաստանի ազգային հավաքականի ավագ Հենրիխ Մխիթարյանը հունվարի 22-ին տեղափոխվել է «Արսենալ», իսկ նրա փոխարեն ՄՅՈւ է տեղափոխվել «զինագործների» հարձակվող Ալեքսիս Սանչեսը։
