ԵՐԵՎԱՆ, 5 Փետրվար — Sputnik. Խորհրդարանական ընդդիմադիր «Ելք» դաշինքն այսօր Երևանում երկրորդ երթ–հանրահավաքն է հրավիրել` թանկացումների և հարկային բեռի ավելացման դեմ։ «Ելքը» պահանջում է վերադառնալ մինչև հունվարի 1-ը գործող նախկին Հարկային օրենսգրքին։ Այս մասին այսօր դաշինքի ներկայացուցիչները հայտարարեցին Երևանում կազմակերպած բողոքի ակցիայի ընթացքում։
«Ցինիզմ է, երբ այս համատարած թանկացումների ֆոնին, բենզինը հունվարից հետո դարձյալ թանկացել է»,– իր ելույթում հայտարարեց «Ելք» դաշինքի պատգամավոր Էդմոն Մարուքյանը։
Պատգամավորը նաև հիշեցրեց, որ «Ելքը» հանդես է եկել ԱԺ արտահերթ նիստ հրավիրելու նախաձեռնությամբ, որի ընթացքում առաջարկում է քննարկել հարկային օրենսգրքում փոփոխությունների հարցը։ «Մենք առաջարկում ենք ակցիզային հարկն ու եկամտահարկը վերադարձնել մինչև հունվարի 1-ը եղած դրույքաչափերին։ Ապրանքը թանկացել է, հարկային բեռն ավելացել է, բայց քաղաքացու որևէ եկամուտ Հայաստանում չի ավելացել»,– ասաց Մարուքյանը։
Նա նաև հայտնեց, որ վաղը «Ելք» դաշինքը խորհրդարանում ստորագրահավաք է կազմակերպելու` արտահերթ նիստ հրավիրելու համար։ Դաշինքը ԱԺ–ում 9 պատգամավոր ունի, ինչը բավարար չէ արտահերթ նիստ հրավիրելու համար։ Ընդդիմադիր «Ծառուկյան» խմբակցությունն այս նախաձեռնությանը միանալու որոշում չի կայացրել։ Իսկ իշխանությունները թանկացումների հարցը քննարկելու համար հունվարի 23-ին ԱԺ–ում «Առանձին ապրանքատեսակների գների բարձրացման պատճառները և գնաճը մեղմելու հնարավորությունները» թեմայով խորհրդարանական լսումներ էին կազմակերպել:
«Լսումները պարզություն մտցնելու փոխարեն շփոթություն առաջացրեցին։ Պետական պաշտոնյաները շփոթմունքի մեջ էին։ Մի մասը հայտարարեց, թե կանաչին չի թանկացել, մի մասը` թե` Եվրոպայում ուսումնասիրությունները ցույց են տվել, որ կարագն այլևս օգտակար չէ։ Մի մասն էլ ասում էին, որ մարդիկ սկսել են մասսայաբար կարագ գնել, դրա համար էլ գինը բարձրացել է»,– ասաց պատգամավոր Արտակ Զեյնալյանը։
Նա նաև վստահություն հայտնեց, որ ժողովրդական ընդվզումն ու բողոքի ալիքը Հայաստանում միակ միջոցն են իշխանությունների որոշումների վրա ազդելու, ուստի ՀՀ քաղաքացիներին կոչ արեց միանալ իրենց նախաձեռնած բողոքի ակցիային։
«Ելք» խմբակցության ղեկավար Նիկոլ Փաշինյանը մինչ հանրահավաքի մեկնարկը Ֆեյսբուք սոցիալական կայքի իր էջում հայտնել էր, որ բողոքի ակցիային ընդառաջ ոստիկաններն այցելում են քաղաքացիական ակտիվիստներին և հորդորում չմասնակցել այսօրվա հանրահավաք-երթին։
Դրանով իշխանությունը, նրա խոսքով, փորձում է ցույց տալ, որ ՀՀ քաղաքացիները չեն բողոքում թանկացումների դեմ և ըմբռնումով են մոտենում դրանց։ «Քանի դեռ քաղաքացիներն իրենց բողոքը չեն արտահայտել, իշխանություններն իրենց քաղաքականության վերանայման ուղղությամբ որևէ քայլ չեն ձեռնարկելու»,– իր հրապարակման մեջ նշել է Փաշինյանը։
Շառլ Ազնավուրի հրապարակում կայացած հանրահավաքի ավարտին մեկնարկեց բողոքի երթը` Երևանի կենտրոնով` Աբովյան փողոց-Հանրապետության հրապարակ-Ամիրյան փողոց-Մաշտոցի պողոտա —Սայաթ Նովա պողոտա —Աբովյան փողոց — Շառլ Ազնավուր հրապարակ երթուղով։
«Ելք» խմբակցության ղեկավար Նիկոլ Փաշինյանի ելույթը Շառլ Ազնավուրի հրապարակում նախանշված է երթի ավարտին։
