ԵՐԵՎԱՆ, 2 փետրվարի — Sputnik. Վերջին ժամանակաշրջանում Odnoklassniki և Facebook սոցիալական ցանցերի միջոցով անհայտ անձինք իրականացնում են խարդախություններ։ Այս մասին հայտնում է Արցախի Հանրապետության Ազգային անվտանգության ծառայությունը։
«Ընտրում են նշված սոցցանցերի ակտիվ օգտատերերին, ուսումնասիրում նրանց կապերը, որից հետո ստեղծում են օգտատիրոջ որևէ բարեկամի կամ ծանոթի կայքէջի կրկնօրինակը: Այնուհետև կեղծ էջի միջոցով շփում հաստատելով օգտատիրոջ հետ ու համոզվելով, որ վերջինս չի հասկացել, որ էջը կեղծ է, հայտնում են, որ ցանկանում են անակնկալ մատուցել՝ գումարի տեսքով և դրա համար բանկային քարտի տվյալներ են անհրաժեշտ ու խնդրում են հայտնել որևէ քարտի 16 նիշանոց հաշվեհամարը և եռանիշ /CVV/CVC/ կոդերը, որոնց միջոցով հաշիվներում առկա գումարներն ամբողջությամբ հափշտակում են»,- նշված է ԱԱԾ-ի տարածած հայտարարության մեջ:
Արցախի Հանրապետության Ազգային անվտանգության ծառայությունը հորդորում է, որ մարդիկ իրենց բանկային տվյալներն ուրիշներին չտրամադրեն համացանցում:
