ԵՐԵՎԱՆ, 1 փետրվարի — Sputnik. Հայաստանը հայտնվել է 2018թ-ին ռուսաստանցիների համար ամենամատչելի զբոսաշրջային ուղղությունների հնգյակում։
Skyscanner-ի` առցանց ավիատոմսեր պատվիրելու ծառայության համաձայն` թռիչքը, երկու շաբաթ երկրում ապրելը, տեղում արված ծախսերը (ներառյալ` ուտելիք, տրանսպորտ և զվարճանքներ) կկազմեն 85,5 հազար ռուբլի։
Ցուցակի առաջին տեղում հայտնվել է Բելառուսը, որտեղ երկու հոգու համար հանգիստը կարժենա 76,5 հազար ռուբլի։ Բելառուսին հաջորդում են Մոլդովան (76 հազար ռուբլի), Աբխազիան (84 հազար ռուբլի) և Հնդկաստանը (85 հազար ռուբլի)։
Ուղևորության արժեքը, ինչպես նաև բնակվելու ծախսերը միջինացված են, բազմապատկված արձակուրդի 14 օրով և վերահաշվարկված դոլարով, որպեսզի զբոսաշրջիկի համար ավելի հեշտ լինի տարբեր երկրների բյուջեները համեմատելը։
Վարկանիշի հեղինակները ձմռանը Հայաստանի զբոսաշրջային առավելություններից են համարում Ծաղկաձոր լեռնադահուկային հանգստավայրը։ Ամռանը ռուս զբոսաշրջիկին կգերի Սևանա լիճը։ Խորհուրդ են տալիս նաև այցելել Երևանի Կասկադ և լեգենդար «Արարատ» կոնյակի գործարան։
2017 թվականի փետրվարի 23-ից Ռուսաստանի քաղաքացիները կարող են Հայաստան այցելել ներքին անձնագրերով։ Համապատասխան փաստաթուղթը ստորագրվել է ՀՀ վարչապետ Կարեն Կարապետյանի` հունվարի վերջին ՌԴ կատարած պաշտոնական այցի արդյունքում։ Կարգը, որի համաձայն ՌԴ քաղաքացիները կարող են ներքին անձնագրերով Հայաստան այցելել, գործում է միայն «Զվարթնոց» (Երևան) և «Շիրակ» (Գյումրի) օդանավակայաններում։
