ԵՐԵՎԱՆ, 29 հունվարի — Sputnik. Սոչիի հայերը Հայաստանում ապրողներից տարբերվում են մտածելակերպով, աշխարհահայացքով ու կյանքի հանդեպ վերաբերմունքով, Sputnik Արմենիայի հետ զրուցում ասաց Եվգենյա Չիստյակովը, որը գործնական ուղևորության շրջանակում է մեր երկիր այցելել։
Եվգենյան նշեց, որ Սոչիի ու Երևանի հայերն այնքան տարբեր են, որքան մոսկվացիներն ու սիբիրցիները։
«Նայում ես, նույն այզգն է, բայց տարբերությունը հսկայական է։ Օրինակ՝ երևանցիները մի կողմից շատ բաց են, մյուս կողմից` ինքնամփոփ։ Իսկ Սոչիի հայերն, ընդհանրապես, փակ մարդիկ են», — նշեց Եվգենյան։
Սոչիի հայերն իրենց բարբառն ունեն, ու երբ նրանց հարցնում են` որ հայերենն է պետք սովորել, միաձայն պնդում են` գրական հայերենը, պատմում է հյուրը։
Հաջորդ կայարանը` Ծաղկաձոր
Մոտ 200 մարդ կար Ծաղկաձորում։ «ՄԵնք մնացինք Ծաղկաձորի հինգաստղանի հյուրանոցում։ Եթե հույզերի լեզվով արտահայտվեմ՝ վաու, հիանալի է, սուպեր։ Իրականում, ես շատ երկրներում եմ եղել։ Համեմատելու տեղ ունեմ», — նշեց Եվգենյան։
Նա ոչ մի տեղ չի հանդիպել այն կոլորիտը, որը տեսել է Հայատանում։ Հայերն, ընդհանուր առմամբ, նրան բարեհամբույր, շփվող ու պատրաստակամ են թվացել։
Ռուսաստանցին մարդկանց նկատմամբ վատ վերաբերունք չի նկատել։ Սակայն Եվգենյան միայն մարդկանց չէ, որ հավանել է։ Նա կարծում է, որ Ծաղկաձորի հինգաստղանի հյուրանոցները լիովին համապատասխանում են աստղերի քանակին՝ սպասարկում, մաքրություն, խնամվածություն, հարմարավետություն ու շքեղություն։
«Ինչու՞ եմ հավանել Ծաղկաձորը։ Քանի որ ինքս Սոչիում եմ ապրում ու այդ քաղաքի էներգետիկան ինձ հոգեհարազատ է՝ լեռներ, արև։ Մեզ մոտ Կրասնայա պոլյանայում ամեն ինչ նույնպես շատ գեղեցիկ է, բայց թանկ։
Հայաստանը Թունիսից լավն է
Եվգենյային դուր են եկել Հայաստանի էքսկուրսիաները։ Նա այցելել է Սևան ու Սևանավանք։ Զբոսավարը, նրա կարծիքով, շատ կիրթ մարդ էր ու բոլոր հարցերի պատասխանները գիտեր։
«Բազմիցս եղել եմ Եվրոպայում, Աֆրիկայում։ Իրականում ակնկալում էի, որ Հայաստանը Թունիսի նման է լինելու։ Այսինքն` իմ պատկերացմամբ կարելի էր մի անգամ գնալ այնտեղ, տեսնել ու մոռանալ դրա մասին։ Սակայն Հայաստանը լրիվ ուրիշ է», — նշեց ռուսաստանցի զբոսաշրջիկը։
Եվգենյայի ուշադրությունից չեն վրիպել ինչպես վարորդները, այնպես էլ հայկական ճանապարհները, նաև՝ մեր առևտրականների մեծ սիրտը։ Նրա խոսքով` նրանք այնքան բարեհոգի են, որ կարող են հենց այնպես ինչ-որ թանկ բան նվիրել։
«Գնումների ընթացքում ինձ նվիրում էին հուշանվերներ, զարդեր ու նույնիսկ՝ լուսնաքար Սևանի հատակից։ Զարմացրեց այն, որ բնական քարերը Հայաստանում շատ էժան են», — ասաց Եվգենյան։
Նա շատ տպավորված էր Մաթոսավանքից, որը գտնվում է Դիլիջան ազգային պարկի տարածքում։ Ռուսաստանցուն զարմացրել է այդ վայրի էներգետիկան, որը կարող է ուժ տալ մարդուն։
Սոչիի բնակիչը նշեց, որ Հայաստանում շատ նուռ կա, ու դրանք ամենուր են՝ նկարներում, սպասքի վրա, գինու մեջ։ Եվգենյան կարծում է, որ նուռը մեր երկրում նույնքան շատ է, որքան խնձորները Գերմանիայում։
Ցավոք, ռուսաստանցին չի հասցրել Ծաղկաձորի ճոպանուղի նստել, բայց խոստանում է վերադառնալ ու լրացնել բացթողումը։
