ԵՐԵՎԱՆ, 30 hունվարի — Sputnik. Անժելա Սահակյանը Փհենչհանի ձմեռային օլիմպիական խաղերում ներգրավված է լինելու ինչպես արտամրցումային, այնպես էլ մրցումային դոպինգ ստուգումների աշխատանքներում:
Այս մասին տեղեկացնում է ՀԱՕԿ–ի մամուլի ծառայությունից։
Ամառային և ձմեռային վերջին երկու օլիմպիական խաղերում աշխատելու նպատակով նաև տարբեր երկրներից դոպինգ սպաներ են հրավիրվում, որպեսզի Խաղերի ժամանակ մարզիկների դոպինգ ստուգման որակն ավելի բարձր լինի:
Հակադոպինգային կազմակերպություններն օլիմպիական խաղերից առաջ, համապատասխան, հրավեր-նամակ են ստանում, որով առաջարկվում է հնարավոր թեկնածուների գիտելիքների, աշխատանքային փորձի և այլ մասնագիտական որակների մասին հանգամանալից տեղեկություններ ուղարկել:
«Քանի որ Հայաստանի հակադոպինգային կազմակերպությունը բավականաչափ փորձ ունի, և մենք արդեն բարձրակարգ դոպինգ սպաներ ունենք, որոշեցինք մասնակցել այս ձմեռային օլիմպիական խաղերի համար հայտարարված մրցույթին: Մեր առաջատար դոպինգ սպաներից Անժելա Սահակյանը ներկայացրեց իր կրթության և գործունեության մասին մանրամասն լրացված հայտ: Ուրախալի է, որ առանց որևէ լրացուցիչ հարցի ու խնդրի Անժելան ընդգրկվեց 45 ընտրյալների մեջ»,-ՀԱՕԿ լրատվականին ասել է Հայաստանի հակադոպինգային ծառայության պետ, կենսաբանության դոկտոր, պրոֆեսոր Արեգ Հովհաննիսյանը:
Անժելա Սահակյանի ճանապարհածախսը Փհենչհան կհոգա Հայաստանի ազգային օլիմպիական կոմիտեն։
