ԵՐԵՎԱՆ, 30 հունվարի — Sputnik. Բարսելոնցի Ալեքս Դոմենեկը 2017 թվականի փետրվարին 5 օր շարունակ ավտոստոպով շրջել է Արցախում։ «Business Insider» պարբերականի հետ հարցազրույցում զբոսաշրջիկը պատմել է իր տպավորությունների մասին ու ցույց է տվել ճանապարհորդության ընթացքում արած լուսանկարները։
Հոդվածը կոչվում է. «Այս ճանապարհորդը հինգ օր շարունակ ավտոստոպով շրջել է Արելյան Եվրոպայում գտնվող սառեցված հակամարտության գոտում` ահա թե ինչպես» ու հրապարակվել է հունվարի 30-ին։
«Նախորդ տարվա փետրվարին Ալեքս Դոմենեկը այցելել է Վրաստան, Հայաստան ու Ադրբեջան, հինգ օր շարունակ ավտոստոպով շրջել է Արցախում, որը տասնամյակների ընթացքում սառեցված հակամարտության գոտի է համարվում։ Հայախոս բնակչություն ունեցող տարածաշրջանի մասին տարաձայնությունները Հայաստանի ու Ադրբեջանի միջև պատերազմի են հանգեցրել։ Չնայած հրադադարի ռեժիմին, հակամարտությունն այնտեղ շարունակվել է ընդհուպ մինչև 2016 թվականը, երբ դաժան բախումներ տեղի ունեցան», — նշում է պարբերականը։
Թեև Դոմենեկը տարածաշրջանում տեղի ունեցած կոնֆլիկտային իրավիճակների ականատես չի եղել, Business Insider-ը նշում է, որ նա տեսել է` ինչ է տարածաշրջանի հետ արել պատերազմը։
Լուսանկարիչն Արցախի շատ շրջաններում է եղել, խոսել է արցախցիների հետ, օգտվել է տեղական հյուրասիրություններից ու գոհ է մնացել։
«Պարզվում է` այնտեղի մարդիկ ջերմ ու հյուրընկալ են», — գրել է Դոմենեկը։
Իր տպավորությունները նա ներկայացրել է ֆոտոշարքով, որոնք կարող ես տեսնել ստորև։
