Հայտնի բլոգեր և ճանապարհորդ Ալեքսանդր Ալիմովը երկու անգամ եղել է Հայաստանում ու Արցախում։ Նա Sputnik Արմենիայի հետ զրույցում պատմել է, թե որքան են համընկնում Մերձբալթյան երկրների բնակիչների պատկերացումներն ու հայկական իրականությունը։ Զրուցել է Լիլիթ Հարությունյանը։
- Ալեքսանդր, դուք եղել եք աշխարհի շատ երկրներում, ծանոթ եք բազում ժողովուրդների ավանդույթներին։ Ի՞նչն է Ձեզ զարմացրել Հայաստանում և Արցախում։
— Ամենից առաջ` հայկական հյուրընկալությունը։ Եվ, իհարկե, խոհանոցը, բնությունը։
- Հայկական խոհանոցում ի՞նչն է ամենից շատ դուր եկել Ձեզ։
— Միսը, ընդ որում` բոլոր ճաշատեսակներում։ Այնպիսի համեղ միս, ինչպիսին Հայաստանում է, աշխարհում ոչ մի տեղ չեմ կերել։ Ինչ ասես փորձել եմ՝ գառան միս, ոչխարի միս, տավարի, միս, խոզի միս… իսկապես համեղ է։
- Մեր հայրենիքում ինչ-որ տեղ կա՞, ուր կցանկանայիք վերադառնալ։
— Ինչպես ասում է ընկերուհիներիցս մեկը, ես հանգստյան բոլոր օրերին պատրաստ եմ մեկնել Արցախ ու Հայաստան (ժպտում է)։ Այո, ինձ այստեղ շատ է դուր գալիս, շատ գեղեցիկ է, մարդիկ ջերմ են, նրանց հետ շփվելը հաճելի է, ես արդեն շատ ընկերներ ունեմ հայերի շարքում։
- Համընկնո՞ւմ են արդյոք Մերձբալթյան երկրների բնակիչների պատկերացումները Հայաստանի և Արցախի մասին։
— Հայաստանի դեպքում, ընդհանուր առմամբ, այո, բայց ահա Արցախի դեպքում ընդհանրապես չեն համընկնում։ Ես անցած տարի երկու անգամ եղել եմ այնտեղ։ Առաջին անգամ Ստեփանակերտում մասնակցում էի բլոգերների և լրագրողների համաժողովին։ Դրանից հետո սեպտեմբերին մեկնեցի երկրորդ անգամ։
Ոչ միայն Մերձբալթյան երկրներում, այլ նաև ամբողջ աշխարհում Արցախը հայտնի է որպես թեժ կետ։ Բայց երբ գնում ես Ստեփանակերտ, բոլորովին այլ տպավորություն ես ստանում։ Անկեղծ ասած, երբ առաջին անգամ էի գնում, մտածում էի` ավերածություններ ու աղքատություն եմ տեսնելու։ Շատ զարմացա, երբ գեղեցիկ ու խնամված քաղաք տեսա։ Եվ ամենագլխավորը` այնտեղ մարդիկ, ինչպես ճիշտ ասեմ… իսկական են։
- Ձեր կարծիքով՝ ի՞նչը կարող է զբոսաշրջիկին հետաքրքրել Հայաստանում։
— Այն ամենը, ինչի մասին խոսեցի, կարող է գրավել։ Ես գիտեմ, որ այստեղ զբոսաշրջությունը զարգացնելու վիթխարի ծրագրեր կան։ Կարծում եմ, որ ամեն ինչ կստացվի։
- Որպես ճանապարհորդ կարո՞ղ եք ասել` ինչը կարող է խանգարել Հայաստանի և Արցախի զբոսաշրջության զարգացմանը։
— Արցախի դեպքում նախ պետք է կոտրել ռազմական գործողությունների մասին կարծրատիպը ։ Իհարկե, կան նաև որոշ խոչընդոտներ՝ կապված լոգիստիկայի հետ, բայց հիմա նոր ճանապարհ են կառուցել (Սոթք-Քարվաճառ ճանապարհը, խմբ.), որով ավելի արագ և հեշտ է դարձել Ստեփանակերտ հասնելը։ Դա մեծ առավելություն է։
Ինչ վերաբերում է Հայաստանին, լոգիստիկան գլխավոր խնդիրն է։ Եթե Եվրոպայից և այլ երկրներից ուղիղ չվերթեր կան Վրաստան, ապա նույնիսկ Մերձբալթյան երկրներից Հայաստան մեկնելը բարդ է, պետք է փոխել ինքնաթիռը։ Ավիաընկերությունները քիչ չեն, բայց բյուջետայիններն ընդամենը երկուսն են։ Երևանի ուղղությամբ սակավաթիվ չվերթերը գլխավոր արգելքներից են։ Չէ՞ որ զանգվածային զբոսաշրջությունը հնարավոր է միայն այն ժամանակ, երբ կան էժան չվերթեր։
- Դուք ֆիլմ եք նկարահանում Հայաստանի և Արցախի մասին։ Ինչո՞ւ։
— Սա մեր առաջին այցն է։ Ես նույնիսկ չգիտեմ, թե ինչն է խթան հանդիսացել, ուղղակի նման ցանկություն կա։
- Որտե՞ղ հնարավոր կլինի դիտել ֆիլմը։
— YouTube-ի մեր ալիքում, սոցիալական մեդիայի հարթակներում՝ բլոգում, կայքում։
