ԵՐԵՎԱՆ, 27 հունվարի — Sputnik. Ֆրանսիան կարող է վերաստանձնել ղարաբաղյան բանակցությունների գործընթացում իր ակտիվ դերակատարությունը: Այս մասին Sputnik Արմենիայի հետ զրույցում ասաց ՌԳԱ Արևելագիտության ինստիտուտի ավագ գիտաշխատող, քաղաքագետ Ալեքսանդր Սկակովը։
«Լեռնային Ղարաբաղի հակամարտությունը սառեցված չէ, խնդրի կարգավորումը համարձակ զիջումներ և հստակ գործողություններ է նախատեսում»,- ասել է Ֆրանսիայի նախագահ Էմանուել Մակրոնը՝ հունվարի 23-ին Հայաստանի նախագահի հետ իր հանդիպման որոշ մանրամասներ ներկայացնող ճեպազրույցում:
«Իրականում Ֆրանսիան կարող էր վերադարձնել ղարաբաղյան գործընթացում իր ակտիվ դերակատարությունը՝ հատկապես ամերիկացիների ակտիվության նվազման ֆոնին։ Ֆրանսիան ներուժ ունի, կարող է ավելի աշխույժ լինել։ Այն, որ մինչև այժմ դա չի եղել, լուրջ բացթողում է Փարիզի արտաքին քաղաքականության համար», — ասաց Սկակովը։
Նրա խոսքով` կարոր է, որպեսզի ԵՄ-ի գործողություններն` ի դեմս Ֆրանսիայի, Ռուսաստանի ու ԱՄՆ-ի, համաձայնեցված լինեն։
«Դեռ, փառք Աստծո, դա այդպես է։ Կարևոր է հետագայում պահպանել Մոսկվա-Բրյուսել/Փարիզ-Վաշինգտոն համաձայնեցված գործողությունների զարգացումը», — ասաց Սկակովը։
Քաղաքագետ Սուրեն Սարգսյանը Sputnik Արմենիայի հետ զրույցում նշեց, որ Ֆրանսիան՝ որպես ԵԱՀԿ ՄԽ համանախագահ, նախկինում էլ առանձնանում էր իր դիրքորոշմամբ ։
«Ֆրանսիայի նախորդ նախագահները նույնպես բավականին ակտիվ էին։ Մակրոնը վերջերս է ստանձնել նախագահի լիազորություններն ու առաջին քայլերն է անում ղարաբաղյան հակամարտության խաղաղ բանակցությունների գործընթացում», — ասել է Սարգսյանը։
Նրա խոսքով` նախագահը լուրջ շեշտադրումներ է արել. ներկայացրել է բանակցային գործընթացի տեսլականը։
Սարգսյանը նշել է, որ դա կարևոր ազդակ է. Ֆրանսիան, որը ոչ միայն իրեն է ներկայացնում, այլև Եվրամիության մանդատ ունի, ակտիվանում է բանակցային գործընթացում։ Միաժամանակ ԱՄՆ-ի կողմից այդ հարցում առանձնապես ակտիվություն չի նկատվում։
Նա նշել է, որ ղարաբաղյան հիմնախնդիրը Փարիզի ուշադրության կենտրոնում է, և Ֆրանսիան այս հարցում իր շահերն ունի։
«Մակրոնը հայտնել է, որ տարածաշրջանում ֆրանկոֆոնիայի տարածումը երկրի հետաքրքրության շրջանակում է, իսկ դա նշանակում է, որ ֆրանսիացիները որոշակի ակտիվություն են դրսևորելու», — ասել է Սարգսյանը։
Գերմանացի քաղաքագետ Ալեքսանդր Ռարը Sputnik Արմենիայի հետ զրույցում հակիրճ բնութագրեց Ֆրանսիայի նախագահին։
«Մակրոնը շատ է խոսում։ Ֆրանսիան փորձում է այդ հարցում որոշակի նախաձեռնություն ցուցաբերել», — ասաց Ռարը։
ՀՀ նախագահ հետ հանդիպմանը Ֆրանսիայի նախագահը հայտնել էր, որ ղարաբաղյան հակամարտության գոտում առկա ստատուս-քվոն կայուն չէ, ինչը խնդիր է առաջացնում։ Ըստ Մակրոնի` լուծումը բացառապես խաղաղ բանակցություններն են։ Ղարաբաղյան հարցի շուրջ բանակցությունների վերսկսումը դրական տեղաշարժ է, բայց հստակ քայլեր է պահանջում ապագայում։
2018 թվականի հոկտեմբերին Մակրոնը ժամանելու է Երևան՝ մասնակցելու Ֆրանկոֆոնիայի գագաթնաժողովին, որպեսզի «ֆրանսալեզու քաղաքականությանը նոր խթան տա»։
