ԵՐԵՎԱՆ, 25 ապրիլի — Sputnik. Ֆրանսիայի նախագահի թեկնածու, «Առաջ» շարժման առաջնորդ Էմանուել Մակրոնը խոստացել է նախագահական ընտրապայքարում հաղթելու դեպքում պայքարել Հայոց ցեղասպանության միջազգային ճանաչման համար։ Այդ մասին նա հայտնել է լրագրողներին։
Մակրոնն ասել է, որ մի քանի շաբաթ առաջ ընտրողների հետ հանդիպման ժամանակ խոստացել էր Կոմիտասի հուշարձանի մոտ հարգանքի տուրք մատուցել Հայոց ցեղասպանության զոհերի հիշատակին։
«Ահա թե ինչու եմ ես հիմա այստեղ։ Շատ կարևոր է պահպանել մեր պատմությունը։ Այո, դա նաև Ֆրանսիայի պատմության մի մասն է, քանի որ հայերը մեծ ներդրում են ունեցել մեր պետության կայացման գործում։ Ես գիտեմ բոլոր այն կարևոր հարցերը, որոնցից մի քանիսը մինչև հիմա չեն լուծվել։ Եվ եթե 15 օր անց ֆրանսացիներն իրենց քվեն տան ինձ, ապա ես Ֆրանսիայում բնակվող հայերի հետ կգնամ մինչև վերջ։ Այսինքն` մինչև Հայոց ցեղասպանության միջազգային ճանաչում»,- ասել է Մատրոնը։
Նա անդրադարձել է նաև Արցախյան հակամարտության խնդրին` նշելով, որ միայն Ֆրանսիայի ջանքերը բավարար չեն այդ հարցը լուծելու համար։
Ֆրանսիայի նախագահի կենտրոնամետ թեկնածու Էմանուել Մակրոնը Փարիզում մասնակցել է Հայոց ցեղասպանության 102-րդ տարելիցին նվիրված հիշատակի միջոցառմանը: Նա ծաղկեպսակ է դրել և մեկ րոպե լռությամբ հարգանքի տուրք մատուցել զոհերի հիշատակին:
