ԵՐԵՎԱՆ, 26 հունվարի — Sputnik, Լաուրա Սարգսյան. ՆՏՎ ալիքի «Դաչնի օտվետ» ծրագրի խոհարարական խորագրի հաղորդավար Ստալիկ Խանկիշիևը որոշել է խոհարարական մարտի հրավիրել «Խոհարարական ավանդույթների զարգացման և պահպանման» հասարակական կազմակերպության նախագահ Սեդրակ Մամուլյանին։
Օրերս Facebook սոցիալական կայքի ադմինիստրացիան 30 օրով արգելափակել է ադրբեջանական ծագում ունեցող ռուսաստանցի խոհարար բլոգեր Ստալիկ Խանկիշիևին։ Պատճառը սոցիալական կայքի մի խումբ օգտատետերի դիմումն է եղել։ Նրանց զայրացրել է Խանկիշիևի «Թյուրքա–հայկական խոհանոցի որոշ հարցերը» հոդվածի դրույթները։ Խանկիշիևը վստահ է, որ Մամուլյանի ընկերները կապ ունեն նրա արգելափակման հետ։
«Ես ու իմ ընկերները զբաղված ենք խոհարարությամբ, ոչ թե քաղաքականությամբ։ Մենք նույնիսկ սոցիալական կայքերում վիճաբանելու ժամանակ չունենք, այնպես որ թող Խանկիշիևն ուրիշ մեղավորներ փնտրի։ Ես իմ հերթին դատապարտում եմ արգելափակման քաղաքականությունը։ Եթե մարդ ասելու բան ունի` թող խոսի ու գրի», – ասաց Մամուլյանը Sputnik Արմենիայի թղթակցին ։
Նրա խոսքով` Խանկիշիևն իրեն տոլմայի ծագման վերաբերյալ վիճաբանության է հրավիրել։ Մամուլյանը հրաժարվել է մի պարզ պատճառով. նա մտադիր չէ կասկածի տակ դնել հայկական խոհարարական ժառանգությունը, նույնիսկ, եթե դա ՅՈՒՆԵՍԿՕ–ն է ասում։
«Քամիների դեմ միայն Դոն Կիխոտն էր պայքարում։ Ադրբեջանում պետք է հասկանան, որ չեն կարող մեզ հետ, մեր ներուժի, մեր պատմության հետ մրցել», – ասաց Մամուլյանը։
Նա համոզված է` Խանկիշեևի անհանգստությունը պայմանավորված է նրանով, որ վերջերս իր` Մամուլյանի ղեկավարած կազմակերպության շնորհիվ աշխարհում ավելի շատ են իմանում Հայաստանի խոհարարական ժառանգության մասին։
«Ես զբաղվում են խոհարարությամբ, ոչ թե քաղաքականությամբ։ Խոհարարությունը ստիպում է զբաղվել գործով, այլ ոչ թե դատարկ քննարկումներով։ Ինչի մասին կարող եմ խոսել մի մարդու հետ, որը իտալական ռիզոտտոն ուզբեկական է համարում», – ասաց Մամուլյանը։
Հայ խոհարարն իրավիճակը ծիծաղելի է համարում, քանի որ Խանկիշիևը փորձում է նույնիսկ Ամերիկայի բացահայտման մեջ ադրբեջանական հետք տեսնել։ Մամուլյանը պատրաստ է պատասխանել ադրբեջանցու մարտահրավերին, եթե այն դուրս չի գա խոհարարական մարտի սահմաններից ու քաղաքականության չի վերածվի։
Մամուլյանն ու նրա թիմն այս տարի պատրաստվում են աշխարհի մի քանի երկրներում տոլմայի մեծ փառատոն կազմակերպել։ Փառատոնը տեղի կունենա Վրաստանում, Ռուսաստանում, Չեխիայում, Գերմանիայում ու մի շարք այլ երկրներում։
