ԵՐԵՎԱՆ, 22 հունվարի — Sputnik. «Ելք» ընդդիմադիր խմբակցությունը հանդես կգա իշխանության թեկնածուի դեմ։ Այդ մասին ԱԺ–ում պատգամավորական ճեպազրույցների ժամանակ ասել են «Ելք» խմբակցության պատգամավոր Գևորգ Գորգիսյանը և Արարատ Միրզոյանը։
Նրանք ցանկանում են նախագահի թեկնածուի պաշտոնում առաջադրել իրենց խմբակցության անդամ, իրավաբան Արտակ Զեյնալյանին, բայց դրա համար նրանց պետք է 27 պատգամավորի ստորագրություն, իսկ խմբակցության մանդատներն ընդամենը ինն են։
«Ելքը» չի հրաժարվի ՀՀԿ–ի թեկնածու Արմեն Սարգսյանի հետ հանդիպումից և պատրաստ է քննարկել հրատապ սոցիալ–տնտեսական հարցերը, մասնավորապես, գնաճը։
Չի կարելի չխոստովանել, որ նախկին վարչապետ Սարգսյանի անունը կապված չէ կոռուպցիոն սկանդալների և բիզնեսի հովանավորչության հետ (եթե հաշվի չառնել նրա մասնաբաժինը Ամուլսարի ոսկի հանքավայրում), նշեց Միրզոյանը։
«Ամեն դեպքում մեր թեկնածուն ավելի նախընտրելի է մեզ համար։ Եթե իշխանական կոալիցիան (ՀՀԿ–ը և ՀՅԴ–ն, խմբ.) ընդունեն նրա արժանիքները, թող ուղղակի 18 ձայն հանձնեն մեզ։ Գոնե նրա համար, որ ինչ-որ մեկն էլ առաջադրվի, լինեն թեկնածուների բանավեճեր։ Առանց այլընտրանքի ընտրությունները դեմ են ժողովրդավարությանը», – ասաց Գորգիսյանը։
Դժվար չէ գուշակել, որ «Ելքը» աջակցություն է ակնկալում նաև «Ծառուկյան» դաշինքից, որը խորհրդարանում 31 մանդատ ունի, նշեց Միրզոյանը։
Ծառուկյանականներն այդ հարցը կրկին անտեսել են` չներկայացնելով ճեպազրույցներին։ Ավելի վաղ դաշինքի առաջնորդ Գագիկ Ծառուկյանը հայտարարել է, որ իշխանության թեկնածուի հաղթանակը երաշխավորված է, ուստի անհեռանկարային է ուրիշ մեկին աջակցելը։
ՀՀԿ խմբակցության ղեկավար Վահրամ Բաղդասարյանն առաջարկեց «Ելք» դաշինքին պայմանավորվել ընդդիմության գործընկերների հետ։ «Բացի այդ, ինձ համար հասկանալի չէ նման դիրքորոշումը. չաջակցել մեր թեկնածուին բացառապես նրա համար, որ մենք ենք առաջադրել։ Թող առաջարկեն մեկ այլ ընդդիմադիր դաշինքի սատարել իրենց։ Իսկ եթե չկարողանան պայմանավորվել, ապա կարող են կրկին դիմել մեզ։ Այդ ժամանակ կարող ենք մտածել իրենց թեկնածուի արժանիքների և ժողովրդավարության, փաստարկների ու բանավեճերի մասին», – ասաց Բաղդասարյանը։
