ԵՐԵՎԱՆ, 20 հունվարի- Sputnik. Տեղեկատվական տեխնոլոգիաների համաշխարհային համաժողովը 2019թ-ին նախատեսվում է անցկացնել Հայաստանում։ Այս մասին տեղեկացնում է ՀՀ տրանսպորտի, կապի և տեղեկատվական տեխնոլոգիաների նախարարության լրատվական ծառայությունը: Իսկ մինչև այդ՝ փետրվարի 19-21-ը Հայաստանը կմասնակցի Հնդկաստանի Հայդարաբադ քաղաքում կազմակերպվող «WCIT 2018» համաժողովին։
«Համաժողովին Հայաստանը կմասնակցի պետական մակարդակով և ներկայացուցչական կազմով»,- նշված է հաղորդագրությունում:
Հնդկաստան կմեկնեն ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը, ԻՏՁՄ (UITE) ներկայացուցչությունը, հեռահաղորդակցության օպերատորներ և ՏՏ ընկերություններ։
Հայկական հաջողակ ՏՏ ընկերությունները կներկայանան միասնական տաղավարով։
«WCIT»-ն ՏՏ ոլորտի խոշորագույն միջոցառումներից է, որին մասնակցում են համաշխարհային տեխնոլոգիական ոլորտի 2-3 հազար առաջատար ընկերություններ` մոտ 100 երկրից։
