ԵՐԵՎԱՆ, 19 հունվարի — Sputnik. Վիտալինա Ցիմբալյուկ-Ռոմանովսկայան որոշել է չլքել 82 տարեկան Արմեն Ջիգարխանյանին։ Այդ մասին գրում է «Կոմսոմոլսկայա պրավդան»։
39 տարեկան դաշնակահարուհին հայտարարել է, որ չի պատրաստվում լքել Ջիգարխանյանին։ Նրա խոսքով, թեև նոյեմբերի 27-ին Կունցևոյի 202-րդ հաշտարար դատարանում բավարարվել է ամուսինների ամուսնալուծության մասին հայցը, բայց նրանք նախկինի պես ամուսնական զույգ են։
«Եթե հնարավոր է հետաձգել մեր ամուսնալուծությունը, ապա ես կանեմ դա։ Ես սպասում եմ Արմեն Բորիսովիչի հետ անձնական հանդիպմանը, որպեսզի ամեն ինչ պարզեմ և ուզում եմ նրանից լսել, թե ինչու է նա ուզում ամուսնալուծվել, ինչից է դժգոհ, ինչ պահանջներ ու հարցեր ունի», — ասել է նա։
Վիտալինան ուզում է իմանալ, թե կոնկրետ ինչ հարցում է իրեն մեղադրում նախկին ամուսինը։ Միաժամանակ Ջիգարխանյանը մտադիր չէ հանդիպել նրա հետ։
Արտիստի փաստաբան Եվգենի Պարֆյոնովի խոսքով` Արմեն Բորիսովիչը հեռուստացույց չի դիտում, համացանցից չի օգտվում, բայց մարդիկ նրան հայտնում են «վերջին նորությունները»։ Հենց այդ պատճառով էլ նախօրեին ԽՍՀՄ ժողովրդական արտիստի ինքնազգացողությունը վատացել էր։
Փաստաբանը վստահեցնում է, որ Վիտալինան առաջնորդվում է ոչ նուրբ զգացմունքներով, այլ խորամանկ հաշվենկատությամբ։
«Այո, դեկտեմբերի վերջին մեր ընդդիմախոսները բողոքարկել են ամուսնալուծության որոշումը։ Ամեն ինչ արվում է ժամանակ ձգելու համար։ Պատրանք է կարծելը, որ Արմեն Բորիսովիչը հանկարծ կսթափվի և կցանկանա հաշտվել։ Մյուս կողմի դրդապատճառները կարող են տարբեր լինել», — կարծում է Պարֆյոնովը։
Փաստաբանի խոսքով` դա արվում է հեռուստահաղորդումներին մասնակցելու համար։ Այնտեղ պայմանագրեր են կնքվում, և նա ահռելի հոնորարներ է ստանում։ Պարֆյոնովը վստահ է, որ հակադիր կողմը տեղեկատվական պատերազմ է հրահրում։
