ԵՐԵՎԱՆ, 19 հունվարի — Sputnik. Ադրբեջանական ընտանիքը Գերմանիայում հարձակվել է ոստիկանության և ներգաղթյալների հարցերով զբաղվող ծառայության աշխատակիցների վրա։ Գերմանական Haller-Kreisblatt պարբերականի փոխանցմամբ, դեպքը տեղի է ունեցել Հարավային Ռեյնի մարզի Բորգոլցհաուզեն քաղաքում ներգաղթյալների համար նախատեսված սոցիալական շենքում։
Ինչպես հայտնում է RTL-ը, փախստականները հարձակվել են ոստիկանության վրա, նրանց ձեռքից վերցրել ատրճանակը, սկսել են կրակել, հետո փակվել են իրենց բնակարանում։ Կրակոցների հետևանքով ոչ ոք չի տուժել։
Ոստիկանությունը տանը հայտնաբերել է արյան մեջ կորած կնոջը։ Սակայն ավելի ուշ պարզվել է, որ նա է իրեն վնասվածքներ հասցրել։
Չորս անդամ ունեցող ընտանիքը 2004 թվականին հաշվառվել է կեղծ անուններով։ Նրանց կացարան չեն տրամադրել բավարար հիմքերի բացակայության պատճառով։ 49 և 53 տարեկան ծնողներն ուզել են տեղափոխվել դստեր մոտ, բայց նրանց մի քանի անգամ բռնել են գողություն անելիս, 2011 թվականին նրանց արտաքսել են։
Ավագ դուստրն ապրել է Բիլեֆելդում, աշխատել վարժարանում։ 2010 թվականին նույնիսկ մրցանակ է ստացել գերմանական «Ֆոլկսբանկից» սոցիալական ակտիվության համար։
Նա վերադարձել է 2012 թվականին։ Որպես բարձրակարգ մանկավարժ` նրան վիզա և ժամանակավոր կացության իրավունք են տվել։ 2013 թվականին եկել են նաև կրտսեր դուստրն ու ծնողները։ Մնալու թույլտվություն է ստացել միայն կրտսերը, իսկ ծնողները վերջնական մերժում են ստացել։
«Ինչ-որ մեկին դուր գա, թե ոչ, միևնույն է, արտաքսման որոշումը պետք է կատարել։ Այլապես ուժային մեթոդները կարող են վտանգավոր նախադեպ դառնալ»,- հայտնել է քաղաքի վարչակազմի ղեկավար Սվեն-Գեորգ Ադենաուերը։
Նրա խոսքով` եթե նույնիսկ հարձակում իրականացնողները սթրեսի կամ աֆեկտի տակ են եղել, ոչինչ չի փոխվում։ Այսուհետև պետք է բացառել նման դեպերը, անհրաժեշտության դեպքում` ընդլայնել ոստիկանության աշխատակիցների քանակը։
