ԵՐԵՎԱՆ, 18 հունվարի — Sputnik. «Զվարթնոց» օդանավակայանում տաքսի ծառայություն իրականացնող անձանց և անհատ տաքսու վարորդներին լիցենզիա տրամադրելուց հետո էլ վերահսկողության տակ պահելու մասին ՀՀ վարչապետի անցած տարվա հանձնարարականը մնացել է անկատար: Այս մասին գրում է «Ժողովուրդ» օրաթերթը` հիշեցնելով Կարեն Կարապետյանի խոսքերը`«անթրաշ, չստիկով, սիգարետը բերանին, Երևանյան լիճը Սևանա լճի տեղ Մալաթիա-Սեբաստիայով բերել, տարիֆների տարբեր կիրառում և այլն»:
ՀՀ տրանսպորտի, կապի և տեղեկատվական տեխնոլոգիաների նախարարությունից թերթին հայտնել են, որ տրանսպորտային պետական տեսչության աշխատակիցներն ամենօրյա վերահսկողություն են իրականացնում, անգամ մի քանի տաքսիստներ վարչական պատասխանատվության են ենթարկվել՝ օրենքով սահմանված պահանջներին չբավարարելու համար, սակայն իրավիճակը շարունակում է նույնը մնալ:
Իսկ տրանսպորտային պետական տեսչության պետի տեղակալ Դ. Մելքոնյանն ասել է, որ տաքսիների վերաբերյալ օրենսդրական փոփոխություններ են նախատեսվում:
