ԵՐԵՎԱՆ, 18 հունվարի — Sputnik. Հայոց ցեղասպանության ճանաչման հարցը Վաշինգտոնի ձեռքում հաղթաթուղթ է Անկարայի դեմ։ ԱՄՆ–ն չի ամաչում պարբերաբար հայկական «խաղաքարտը» Թուրքիայի դեմ օգտագործելուց, համոզված է թուրքագետ Տիրան Լոքմագեզյանը։
«ԱՄՆ–ն չի հրաժարվի իր հաղթաթղթից` Հայոց ցեղասպանության ճանաչման հարցից, որը նա Թուրքիայի դեմ է օգտագործում։ Նրանք հանում են այդ «խաղաքարտը», երբ նրանց հարկավոր է, իսկ հարկ եղած ժամանակ պահում են այն։ ԱՄՆ–ն չի ճանաչի Հայոց ցեղասպանությունը, սակայն մշտապես կանդրադառնա դրան», – լրագրողներին ասաց Լոքմագեզյանը։
Նրա խոսքով` պետք չէ հայ-ամերիկյան հարաբերություններին միանշանակ նայել, ու նույնիսկ եթե տարիներ անց պարզվի, որ ԱՄՆ–ի ու Թուրքիայի միջև առճակատումը միայն տեսիլք է, այլ ոչ թե իրականություն, դրանում ոչ մի զարմանալի բան չի լինի։
«Վաշինգտոնի ու Անկարայի հարաբերությունները կարելի է համեմատել թուրք–իսրայելականի հետ, երբ քաղաքական հարաբերությունների վատացումը տեսանելի էր, ու այդ ֆոնին երկկողմանի հարաբերությունները տնտեսական ոլորտում միայն ամրապնդվել են` աննախադեպ մակարդակի հասնելով», – ասաց Լոքմագեզյանը։
Լոքմագեզյանը համոզված է, որ Էրդողանը մեծ խաղ է սկսել, որը սկիզբ է առել Իսրայելից։ Դրանով նա փորձում էր արաբական աշխարհի դիմաց միավորներ հավաքել։
Փորձագետը համարում է, որ ՄԱԿ–ի Գլխավոր ասամբլեայի 72-րդ նստաշրջանին նախագահ Սերժ Սարգսյանի արած հայտարարությունը, որ 2018 թվականի գարունը Երևանը կդիմավորի առանց թուրքական արձանագրությունների, քանի որ դրանք վտանգավոր են Հայաստանի համար, իրականություն կդառնա։
2008 թվականին բանակցությունները սկսվել են թուրքական կողմի համաձայնությամբ։ Այդ բանակցությունների հիման վրա 2009–ին ստորագրվել են ցյուրիխյան արձանագրությունները։ Սեպտեմբերին ՀՀ նախագահ Սերժ Սարգսյանը, ելույթ ունենալով ՄԱԿ–ի Գլխավոր ասամբլեայում, Նյու Յորքում հայտնել է, որ Երևանը 2018 գարունն առանց արձանագրությունների կդիմավորի։ Դա հաստատել է ՀՀ արտգործնախարար Էդվարդ Նալբանդյանը։
