ԵՐԵՎԱՆ, 18 դեկտեմբերի — Sputnik. Թուրքիայի կառավարությունն անտարբերության է մատնում Պոլսո հայոց պատրիարքի ընտրության հարցը։ «Ակոս» թերթի հայկական բաժնի խմբագրապետ Բագրատ Էստուկյանը Sputnik Արմենիայի հետ զրույցում ասաց, որ այդ երկրի իշխանություններին ուղղված հայ համայնքի նամակներն անպատասխան են մնում։
«Պարզ չէ, թե որքան երկար կարող է ձգվել այս վիճակը։ Հնարավոր է նույնիսկ տարիներ, քանի որ ոչ մի պաշտոնական պատճառաբանություն կամ մեկնաբանություն չի տրվում, հայտնի չէ, թե մենք քանի տարի կարող ենք անհույս սպասել»,- ասաց Էստուկյանը։
Խմբագրի խոսքով, առանց Թուրքիայի կառավարության թույլտվության հայ հոգևոր համայնքն այդ երկրում առաջնորդի ընտրություններ անցկացնելու իրավունք չունի։
«Պատրիարքարանն անճարության է մատնված, քանի որ այս պայմաններում ոչ մի բան անել չի կարող»,- ասաց Էստուկյանը։
Միակ անելիքը կառավարությանը հղված նամակներն են, որոնք արդեն մի քանի ամիս է` անպատասխան են մնում։
Էստուկյանը Թուրքիայի իշխանության պահվածքում ոչ թե պատահականություն, այլ դիտավորություն է տեսնում։ Նրա համոզմամբ, նպատակը Պոլսո հայոց պատրիարքի տեղապահ արքեպիսկոպոս Գարեգին Բեքչյանի հրաժարականին հասնելն է։
«Թուրքիայի կառավարության նախընտրելի փոխանորդը իրենց կողմից նշանակված Արամ սրբազանն էր։ Հետևաբար նրանք ցանկանում էին, որ Արամ Աթեշյանը մնար, և ոչ մի ընտրություն էլ չկազմակերպվեր։ Բայց կրոնական ժողովի որոշումը Թուրքիայի իշխանությունների այդ որոշմանը դեմ գնաց` Բեքչյան սրբազանին տեղապահ նշանակելով»,- ասաց Էստուկյանը։
Նրա բնորոշմամբ, Պոլսո հայ հոգևոր համայնքն այժմ անորոշության, անհաղորդության մեջ է, և չի բացառում, որ Թուրքիայի կառավարությունն այսպիսով վրեժ է լուծում իրեն չենթարկվելու համար։
Թուրքիայի հայերի պատրիարք Մեսրոպ Մութաֆյանը առողջական խնդիրների պատճառով արդեն շուրջ 9 տարի չի կարողանում կատարել պատրիարքի պարտականությունները: Դրանք ժամանակավորապես իրականացնում էր պատրիարքի փոխանորդ Արամ արքեպիսկոպոս Աթեշյանը։
Սակայն 2017թ-ի մարտի 15-ին անցկացվեց պատրիարքական տեղապահի ընտրություն, որի արդյունքում տեղապահի պաշտոնում ընտրվեց Գարեգին արքեպիսկոպոս Բեքչյանը, ինչից հետո Արամ արքեպիսկոպոսը ստիպված հրաժարական տվեց։
Այդ ժամանակվանից սկսած` Պոլսո պատրիարքարանը պարբերաբար դիմում-նամակներ է ներկայացնում Թուրքիայի ներքին գործերի նախարարություն` պատրիարքի նոր ընտրություններ նշանակելու համար։
Ի սկզբանե Հայոց եկեղեցին Թուրքիայի իշխանություններին երկու փուլով ընտրության օրեր էր առաջարկել դեկտեմբերի 10-ն ու 13-ը:
