ԵՐԵՎԱՆ, 17 հունվարի — Sputnik, Լաուրա Սարգսյան. Հայկական դպրոցի բացումը (Սամցխե-Ջավախքում) չի զարմացրել հայաբնակ Գումբուրդոյի բնակիչներին, Sputnik Արմենիայի հետ զրույցում ասաց Ախալքալաքի քաղաքապետ Յուրիկ Հունանյանը։
Եռահարկ ու հարմարավետ դպրոցը, որ 1700 քառակուսի մետր տարածք ունի, կահավորված է ժամանակակից տեխնիկայով ու սարքավորումներով, լողավազանով, մարզասրահով ու ֆուտբոլի դաշտով, բացվել է հունվարի 16-ին։
«Գումբուրդոյում հայկական դպրոց միշտ էլ եղել է, բայց հինն արդեն անմխիթար վիճակում էր։ Գյուղի նախկին բնակիչ Շուշիկ Մղդեսյանի օգնությամբ երեխաները հիմա ունեն նոր, հարմարավետ դպրոց` բոլոր հարմարություններով», — ասաց Հունանյանը։
Նրա խոսքով` դպրոցում ուսուցումը հայերեն կլինի, բայց մինչ այդ պետք է լուծել ամենամեծ խնդիրները` որակյալ մասնագետներին գյուղ բերելն ու վրացերենի մակարդակը բարձրացնելը։
Այդ հարցում գյուղացիներին խոստացել է օգնել Վրաստանի կրթության նախարար Միխեիլ Չխենկելին։
Դպրոցի բացումը կարևորում է նաև Հայ առաքելական եկեղեցու Վիրահայոց թեմի մամուլի քարտուղար Սուսաննա Խաչատրյանը։ Դպրոցը կարող է ամբողջովին լուծել ավելի քան երեք հազար հայերով բնակեցված գյուղի կրթական հարցերը։
«Հայերը Գումբուրդոյում հիմնվել են 1928 թվականից, ստեղծել ու բացել են Սուրբ Աստվածածին եկեղեցին, նաև դպրոց են հիմնել։ Նոր դպրոցում աշխատանքներն ավարտվել էին այս տարվա օգոստոսին», — ասաց Խաչատրյանը։
Բարերար Շուշիկ Մղդեսյանի օգնությունն աննկատ չի մնացել. ՀՀ սփյուռքի նախարարությունը նրան ոսկե մեդալ է շնորհել, իսկ ճարտարապետ Ռուբեն Եղիազարյանն ու շինարար Միսակ Կուրղինյանը արծաթե մեդալներ են ստացել։
Վերջերս Գումբուրդո գյուղը Հայաստանի ու Վրաստանի լրատվամիջոցների ուշադրության կենտրոնում էր հայտնվել գյուղացիների ու երկրի ոստիկանների բախման պատճառով։
Նախորդ տարվա սեպտեմբերի 30-ի առավոտյան Ջավախքի Գումբուրդո գյուղի հայ բնակիչները փորձել էին խաչքար տեղադրել 10-րդ դարի եկեղեցու բակում, բայց իշխանությունները թույլ չէին տվել, որի հետևանքով բախում էր տեղի ունեցել ոստիկանների և գյուղացիների միջև: Գյուղ էր բերվել Վրաստանի ոստիկանության հատուկ նշանակության գումարտակը, դեպքի վայր էր ժամանել Վրաստանի ներքին գործերի նախարար Գեորգի Մգբերիշվիլին։
Հայ առաքելական եկեղեցու վիրահայոց թեմը կասկածներ չունի Գումբուրդոյում գտնվող եկեղեցու հարցում։ XV դարից ի վեր հայերն աղոթում ու արարողություններ են անցկացնում Սուրբ Համբարձում եկեղեցում։ Այդ ժամանակի ի վեր եկեղեցու բակում նաև հայկական գերեզմանատուն կա։
Հիշեցնենք` ավելի վաղ Գումբուրդոյի միջադեպից հետո ձևավորված աշխատանքային խումբը քննարկել և եկել էր համաձայնության, որ եկեղեցու վերանորոգման աշխատանքները վերջացնելուց հետո, մոտավորապես 3 տարի անց, ոսկորները կթաղվեն եկեղեցու բակում, և կկանգնեցվի խաչքար։
