ԵՐԵՎԱՆ, 17 հունվարի — Sputnik. ՀՀ ԱԳՆ-ն հերքում է տեղեկությունն այն մասին, որ Մեքսիկայից մեկնող «Ռոսիա» ավիաընկերության չվերթի հետաձգումը կապված է եղել երկրի իշխանությունների պահանջի հետ` հենց նույն չվերթով ժամանման երկիր վերադարձնել Հայաստանի չորս քաղաքացու։
Ավելի վաղ «Ռոսիա» ավիաընկերության ներկայացուցիչը հայտնել էր ՌԻԱ Նովոստիին, որ իրենց ինքնաթիռը չի կարող Ռուսաստան մեկնել Մեքսիկայի Կանկուն քաղաքից` Մեքսիկայի իշխանությունների ավիացիոն գործողությունների պատճառով։ Ի սկզբանե, նրա խոսքով, FV5882 չարթերային չվերթը պետք է մեկներ Boeing-747 ինքնաթիռով հունվարի 16-ին մոսկովյան ժամանակով ժամը 18.10-ին։ Սակայն Մեքսիկայի Միացյալ Նահանգների միգրացիոն ծառայության պահանջով «Ռոսիա» ավիաընկերության չվերթով պետք է ժամանման երկիր վերադարձվեին ՀՀ չորս քաղաքացի։ Ավիաընկերությունից հայտնել էին, որ այդ պատճառով օդանավակայանը մեկնելու թույլտվություն չէր տալիս։
«Մեքսիկայում ՀՀ դեսպանությունից ստացված տեղեկատվության համաձայն` «Ռոսիա» ավիաընկերության` Կանկունից չվերթի ուշացման պատճառ է հանդիսացել ավիաընկերության կուտակված ֆինանսական պարտքը: Մեքսիկայի միգրացիոն ծառայությունից ստացված տեղեկատվության համաձայն, չվերթի ուշացումը որևէ կապ չունի Հայաստանի քաղաքացիների հետ, որոնք, Մոսկվայում ստանալով Մեքսիկայի մուտքի արտոնագրեր, մեկնել են Կանկուն, և որոնց, սակայն, թույլ չեն տվել մուտք գործել երկիր: Ինչից հետո Մեքսիկայի միգրացիոն իշխանությունների կողմից որոշում է կայացվել նրանց վերադարձնել ժամանման երկիր, այսինքն՝ Ռուսաստան», — ասված է ՀՀ արտգործնախարարությանը հաղորդագրության մեջ։
Ըստ ժամանակացույցի` Կանկունից ժամանած FV5882 չվերթը պետք է վայրէջք կատարեր հունվարի 17-ին «Վնուկովո» օդանավակայանում Մոսկվայի ժամանակով ժամը 5:40-ին, սակայն ժամը 10:00-ի տվյալներով ինքնաթիռը դեռ չէր մեկնել։
