ԵՐԵՎԱՆ, 11 հունվարի — Sputnik. Դիզվառելիքի թանկացումը գյուղմթերքի գների վրա էապես չի ազդի։ Այսօր կառավարությունում լրագրողների հետ ճեպազրույցում ասաց ՀՀ գյուղատնտեսության փոխնախարար Ռոբերտ Մակարյանը։
«Օրինակ` դիզվառելիքի 15%-ով թանկացումը լոլիկի, խաղողի, կարտոֆիլի դեպքում բերելու է ընդամենը ինքնարժեքի մինչև 2 դրամի թանկացման։ Այսինքն` սա էական ազդեցություն չի կարող ունենալ ինչպես ինքնարժեքի, այնպես էլ գնի վրա»,– ասաց փոխնախարարը։
Այդուհանդերձ, Մակարյանի հավաստմամբ, նախարարությունը դիտարկումներ է իրականացնում շուկայում, և, եթե խնդիր լինի, խոստանում է սուբսիդավորել վառելիքի գինը` գնաճը կանխելու և գյուղացուն ծանր կացության մեջ չթողնելու համար։ Այս պահին, սակայն, դրա կարիքը, նախարարության պաշտոնյանի համոզմամբ, չկա։
Գյուղմթերքների արդեն իսկ արձանագրված թանկացումներում կան ինչպես օբյեկտիվ, այնպես էլ սուբյեկտիվ պատճառներ։ Անդրադառնալով ՀՀ նախագահի` անհարկի գնաճը կանխելու հանձնարարականին, Մակարյանն ասաց։
«Որոշակի ապրանքատեսակներ կան, որոնց գնաճը սուբյեկտիվ է։ Բայց որպեսզի այսօր մերկապարանոց չհնչի մեր հայտարարությունը, վերլուծություններ են արվելու։ Օրինակ` պանրի թանկացումը նշեմ։ 2017թ–ի դեկտեմբերին 2016թ–ի դեկտեմբերի համեմատ պանրի գնաճը եղել է 10 %: Բայց այստեղ առանձնահատկությունն այն է, որ կաթը մթերվել է ամռանը, երբ կաթն այսօրվա գնի համեմատ բավական էժան էր։ Այն ժամանակ մթերել են 130 դրամով, հիմա 200-210–ի սահմաններում։ Բայց այսօրվա կաթից ոչ ոք պանիր չի պատրաստում։ Այդ ապրանքը պատրաստվել է ամռանը»,– ասաց փոխնախարարը։
Պարզաբանումներ ներկայացնելու համար նախարարությունը հաջորդ շաբաթ հանդիպում–քննարկումների է հրավիրելու ոչ միայն պանիր արտադրողներին, այլ թռչնաբույծներին։ Անհիմն թանկացումը չբացառելով հանդերձ` գյուղփոխնախարարը խորհուրդ տվեց սպասել տնտեսվարողների բացատրություններին։
Մինչ այդ փոխնախարարը չժխտեց, որ որոշ արտադրողներ էլ, օգտվելով այն հանգամանքից, որ ավելացել է պահանջարկը, բարձրացնում են գները։ Տարեվերջին նման բան տեղի ունեցավ մսի շուկայում, երբ արտահանման ծավալների ավելացմանը զուգահեռ տնտեսվարողները բարձրացրեցին նաև ներքին շուկայի գները։
Իսկ կարտոֆիլի շուկայում Ռոբերտ Մակարյանն առաջիկայում նույնիսկ էժանացում է կանխատեսում։ Նրա խոսքով` կա մեծ քանակությամբ ամբարված կարտոֆիլ, որի շուկա հասնելուն պես կարտոֆիլի մանրածախ գինը նկատելիորեն կնվազի։
