ԵՐԵՎԱՆ, 11 Հունվար — Sputnik. Մարդու իրավունքների եվրոպական դատարանը (ՄԻԵԴ) հրապարակեց հերթական վճիռն ընդդեմ Հայաստանի Հանրապետության։
Մարդու իրավունքների եվրոպական դատարանն այս անգամ բավարարել է Դանիայի Թագավորությունում ՀՀ արտակարգ և լիազոր դեսպան Ալեքսանդր Արզումանյանի հայցը։ Այս մասին ինֆորմացիան հրապարակվել է ՄԻԵԴ–ի պաշտոնական կայքում։
Հայաստանի կառավարությունը քաղաքական գործիչ, դիվանագետ Ալեքսանդր Արզումանյանին կվճարի 2000 եվրո որպես բարոյական փոխհատուցում և 500 եվրո դատական ծախսերի համար։ Մասնավորապես, ՄԻԵԴ-ը որոշել է, որ այս գործով տեղի է ունեցել Մարդու իրավունքների եվրոպական կոնվենցիայի 5-րդ և 3-րդ հոդվածների խախտում. խախտվել են նրա` Ազատության և անձնական անձեռնմխելիության, ողջամիտ ժամկետում դատական քննության իրավունքները։
Արզումանյանը ՄԻԵԴ հայց է ներկայացրել տարիներ առաջ: Որպես ՀՀ արտաքին գործերի նախկին նախարար և «Քաղաքացիական անհնազանդություն» շարժման առաջնորդ, Ալեքսանդր Արզումանյանը բողոքարկել է իրեն կալանքի տակ պահելու հանգամանքը։ Կալանքի տակ նա հայտնվել էր «Փողերի լվացման» հայտնի գործով։
Ալեքսանդր Արզումանյանը ձերբակալվել էր 2007 թվականի մայիսին և կալանավորվել ապօրինի եկամուտների օրինականացման կասկածանքով։
Դանիայի Թագավորությունում ՀՀ ներկայիս արտակարգ և լիազոր դեսպան Ալեքսանդր Արզումանյանը հայց էր ներկայացրել տարիներ առաջ՝ մինչև այս պաշտոնին նշանակվելը։ Նա դեսպան է նշանակվել 2017թ.–ին։
