ԵՐԵՎԱՆ, 11 հունվարի — Sputnik. ՀՀ կառավարությունն այսօրվա նիստում հաստատեց աջակողմյան ղեկով ավտոմեքենաների շահագործումն ու ներմուծումը սահմանափակող վիճահարույց նախագիծը։
ՀՀ տրանսպորտի, կապի և տեղեկատվական տեխնոլոգիաների նախարարը ներկայացնելով նախագիծը, հայտնեց, որ ապրիլի 1-ից արգելվում է միայն ապրիլի 1-ից հետո Հայաստան ներմուծված ավտոմեքենաների հաշվառումն ու շահագործումը։
«Աջակողմյան ղեկային տեղաբաշխմամբ տրանսպորտային միջոցների ներմուծման ժամանակավոր արգելքի մասին» օրենքի նախագիծը ներկայացնելիս Մարտիրոսյանը հայտնեց, որ ապահովագրական ընկերություններից ստացված տվյալների համաձայն` աջակողմյան ղեկով ավտոմեքենաների վթարները կազմում են ընդհանուր վիճակագրության 28%-ը, իսկ վնասվածքներ ստացածները 39%-ով շատ են եղել։
Նիստը վարող փոխվարչապետ Վաչե Գաբրիելյանի հարցին, թե մինչև ապրիլի 1-ը Հայաստան ներմուծված ավտոմեքենաների սեփականատերերը կարո՞ղ են ազատ վարել և վերավաճառել իրենց ավտոմեքենաները, նախարարը պատասխանեց.
«Այո, մինչև ապրիլի 1-ը ներմուծված ավտոմեքենաները կարող են ազատ գրանցել, հաշվառել, վերահաշվառել, վաճառել և կատարել ցանկացած գործողություն իրենց ավտոմեքենաների հետ»։
Օրենքում փոփոխություններ իրականացնելու նախագիծն արդեն կներկայացվի ԱԺ։ Փոխվարչապետն էլ առաջարկեց ապրիլի 1-ից հետո արգելել նաև այդ ավտոմեքենաների ներմուծումը Հայաստան։
Բայց, ինչպես նիստից հետո լրագրողներին պարզաբանեց նախարար Մարտիրոսյանը, ներմուծման հետ կապված օրենսդրության մեջ փոփոխությունների հասցեատերը, Մաքսային միության կանոնադրության համաձայն, ՀՀ Ազգային ժողովն է։
Հիշեցնենք` պաշտոնական տվյալներով` ՀՀ-ում աջ ղեկով շուրջ 35 հազար ավտոմեքենա կա, որոնց տերերը կառավարության նախաձեռնությունը հակասահմանադրական են համարում ու պայքարում դրա ընդունման դեմ: Նրանք նաև որոշել էին հունվարի 12-ից հետո այս հարցով հանդիպում և քննարկում ունենալ վարչապետ Կարեն Կարապետյանի հետ, որն այս օրերին հետտոնական արձակուրդում է։
