ԵՐԵՎԱՆ, 7 հունվարի — Sputnik. Armenia հեշթեգների քանակը Instagram սոցիալական կայքում մեկ օրվա՝ Սուրբ ծնունդի ընթացքում գերազանցել է 1000-ը, իսկ տարեսկզբից ի վեր` 7000-ը։
Որքան շատ են կոնկրետ երկրի, քաղաքի հետ կապված հեշթեգները, այնքան այդ երկիրն ավելի գրավիչ է դառնում օտարերկրացիների աչքերում։ Պատասխանը մեկն է` եթե մարդիկ այդ երկրում նկարված լուսանկարներ են հրապարակում, ուրեմն իսկապես արժի այցելել տվյալ երկիր։ Instagram-ի օգտատերերն այս օրերին տոնական լուսանկարներ ու տեսանյութեր են հրապարակում։ Հրապարակումների շարքում կարելի է տեսնել ճանապարհորդական լուսանկարներ ու տեսանյութեր, ազգային խոհանոցի ուտեստներ, սելֆի, բարեկամների ու ընկերների հետ լուսանկարներ։
Վերջին շաբաթվա ընթացքում շատ ակտիվ էին զբոսաշրջիկները, որոնք լուսանկարներ էին տեղադրում հայաստանյան ուղևորությունից։ Ի դեպ, հենց նրանց շնորհիվ են ակտիվացել մեր երկրի տարբեր քաղաքների անվանումներով հեշթեգները՝ Երևան, Ծաղկաձոր, Գառնի, Գեղարդ, Ալավերդի, Սաղմոսավանք, Սևան և այլն։
Իհարկե, հրապարակումների ցանկում էին նաև Սուրբ ծնունդի ու Ամանորի թեմայով լուսանկարներն ու տեսանյութերը։ Տեղեկատվական անվտանգության փորձագետ Սամվել Մարտիրոսյանը Sputnik Արմենիայի խնդրանքով մեկնաբանեց այդպիսի ակտիվությունը Instagram-ում ։
«Սովորաբար հունվարի 6-ին հայկական թեման թրենդային է դառնում, քանի որ միայն մենք ենք այդ օրը նշում Սուրբ ծնունդը։ Եվ, իհարկե, զբոսաշրջիկների հրապարակումներն էլ դերակատարություն ունեն», — ասաց նա։
Ի դեպ, ստացվում է, որ մի փոքր մարքեթինգային գաղտնիք կա։ Instagram-ում մեծ թվով վաճառողներ կան, որոնք տարբեր երկրների ազգային տոների ժամանակ օգտվում են իրավիճակից ու համապատասխան հեշթեգ դնում։ Կարելի է մարդկանց կոնկրետ զանգվածի հետ աշխատել ու ավելի շատ հաճախորդ գրավել։
Մեր հայրենակիցների դեպքում էլ այդ ամենը կարող է «լավ աշխատել», քանի որ նրանք միշտ հայկական թեմատիկայի հետ կապված նյութեր են փնտրում։
Այս պահին «Armenia» հեշթեգների քանակն Instagram-ում 3.025.700 է, իսկ «Армения»-ինը ՝ 693 059։ «Yerevan» նշումով հրապարակումների թիվը կազմում է 830 295, իսկ «Ереван»՝ 399 717, չհաշված նաև այն, որ շատ էջեր փակ են, իսկ օգտատերերի մի մասը մոռանում է կամ պարզապես հեշթեգներ չի դնում։
