ԵՐԵՎԱՆ, 6 հունվարի – Sputnik, Արամ Գարեգինյան․ Նոր՝ 2018 թվականը Հայաստանում կրկին նշել են արտասահմանից ուղարկած գումարներով։ Մարդիկ սկսել են ավելի շատ ծախսել, թեև նրանց աշխատածն ավելի շատ չէ։ Այդ դեպքում որտեղի՞ց փողերը։ Պատասխանը պարզ է․ արտասահմանում աշխատող հարազատներից։
2017թ-ին արտագնա աշխատողներն ավելի շատ փող են ուղարկել տուն։ Եվ կրկին յուրաքանչյուր 10 դոլարից 9-ին բաժին են ընկնում Ռուսաստանից կատարած փոխանցումներին։ 9 ամիսների ընթացքում ՌԴ-ից փոխանումները 15 տոկոսով աճել են։
Ամենայն հավանականությամբ, աշխատանքը կբավականացնի նաև գալիք տարում։ 2018թ-ի վերջին կանխատեսման մեջ Համաշխարհային բանկը բարձրացրել է Ռուսաստանի ՀՆԱ-ն 1,4 տոկոսից մինչև 1,7 տոկոս։ Ռուսաստանի վիճակագրական ծառայության տվյալներով՝ Ռուսաստանում գործազուրկների թիվը կրճատվում է․2017թ-ի նոյեմբերին գործազուրկներն ավելի քիչ են եղել, քան 2014թ-ի անկումից առաջ։
Ռուսաստանցիները սկսել են ավելի հաճախ այցելել խանութներ։ Իսկ Հայաստանից նրանց ավելի շատ են սկսել ուղարկել համեղ ուտելիք, ինչպես նաև հագուստ։ Ուստի, 2017թ-ի 11 ամիսների ընթացքում արտահանումն ավելացել է գրեթե 25 տոկոսով։
Որքան շատ են մեր փողերը, այնքան շատ ենք մենք ուզում ձեռք բերել արտասահմանյան ապրանքներ։ Այդպես է ոչ միայն Ռուսաստանում, այլ նաև Հայաստանում։ Մեր մասնավոր ծախսերը 2017թ-ի երրորդ եռամսյակում աճել են 7,2 տոկոսով, իսկ ներկրումն աճել է 17,3 տոկոսով։ Տոներն ավարտվում են, և շուտով մեր հայրերը և ավագ եղբայրները հետ կվերադառնան՝ հաջորդ Նոր տարվա համար գումար վաստակելու։
