ԵՐԵՎԱՆ, 6 հունվարի — Sputnik. Անվանի ֆրանսիացի դերասան, համաշխարհային կինոյի մեծագույն աստղերից մեկը՝ Լուի դե Ֆյունեսը, նախընտրել է հայկական խոհանոց, Հայաստանի Հանրային հեռուստատեսությանը տված հարցազրույցում պատմել է նրա ընտանիքի նախկին խոհարար Աղունիկ Սարգսյանը։
Սարգսյանն ապրել է Վանաձորում, 1949թ-ին ամուսնացել է սիրիահայի հետ և նրա հետ գնացել Մարսել։ Ֆրանսիան դուր չի եկել նրանց, ցանկացել են վերադառնալ, բայց նրա ամուսնուն թույլ չեն տվել վերադառնալ ԽՍՀՄ։
Սարգսյանը նամակ է գրել Բրեժնևին և տվել այն Վազգեն Առաջին կաթողիկոսին, որը Փարիզում է եղել։
Իսկ մինչ այդ նրան հաջողվել է աշխատանք գտնել․ դարձել է լեգենդար դերասան Լուի դե Ֆյունեսի խոհարարը։
«Նրանք մեզ տուն էին տվել իրենց այգում։ Այնտեղ էլ ապրում էինք», — պատմում է Սարգսյանը։ Նա ասել է, որ Ֆյունեսին դուր է եկել հայկական խոհանոցը։Սարգսյանը պատրաստել սովորել էր իր էրզրումցի տատիկից։
«Ես շատ հաճախ եմ պատրաստել հայկական ապուրներ՝ լոբով, ավելուկով։ Նա սիրում էր տոլմա, քաբաբ․ մենք կրակ էինք վառում, ես ցույց էի տալիս, թե ինչպես պետք է քաբաբ պատրաստել», — հիշում է Սարգսյանը։
Ֆյունեսի տանը շատ հայեր են հյուրընկալվել, սեղանին հաճախ են դրվել հայկական ազգային ճաշատեսակներ։ Սարգսյանի աղջիկը Ֆյունեսին հայերեն տառերն է սովորեցրել։
Մի անգամ դերասանը փորձել է օգնել Սարգսյանին լամպը փոխելու հարցում։ Ցածր հասակի պատճառով նա կանգնել է աթոռի վրա և ընկել. երկուսն էլ երկար ծիծաղել են։
Աղունիկ Սարգսյանը Ֆրանսիայում աշխատել է 5 տարի, դրանից հետո նրա խնդրանքը, վերջապես, հասել է ԽՍՀՄ գլխավոր քարտուղարին։ Կինը վերադարձել է Հայաստան։ Մինչև վերջերս Ֆյունեսի ընտանիքն ամեն ամիս 100 դոլար է ուղարկել նրանց։
Նա իր հետ նաև հագուստ է բերել, որը նվիրել են Ֆյունես ընտանիքի անդամները։ Ընտանիքում պահում են կիսով չափ լիքը կոնյակի շիշը, որը նույնպես Ֆյունեսներն են նվիրել։
