ԵՐԵՎԱՆ, 17 օգոստոսի — Sputnik. Աշխարհահռչակ երգիչ Շառլ Ազնավուրը Լոս Անջելես մեկնելուց առաջ ճաշել է Ֆրանսիայի նախկին նախագահ Ֆրանսուա Օլանդի և նրա կնոջ` Ջուլի Գայեի հետ։ Այս մասին Facebook-ի իր էջում հայտնել է Ֆրանսիայի հայ համայնքի ներկայացուցիչ Ռիշար Ֆինդիկյանը։
Ազնավուրին ուղեկցել են ընկերը` Միշել Դրակերն ու նրա կինը՝ Դենի Սավալը։
Լոս Անջելեսում Ազնավուրը կմասնակցի Փառքի արահետում իր անվան աստղի բացմանը։ Արարողությանը ներկա կլինեն նաև հեռուստաաստղ Քիմ Քարդաշյանն ու հայտնի դերասան Ռոբերտ դե Նիրոն։
93-ամյա երգչի անվան աստղի բացումը նախատեսված է օգոստոսի 24-ին։ Շառլ Ազնավուրի աստղը 2618-ը կլինի Փառքի արահետում։ Ինչպես գրում է ֆրանսիական մամուլը, Ազնավուրը պետք է «Հոլիվուդ հիսթորիք թրասթ» ասոցիացիային վճարի 40 հազար դոլար կամ 34 հազար եվրո այդ արահետում սեփական աստղ ունենալու համար։
