ԵՐԵՎԱՆ, 29 դեկտեմբերի- Sputnik, Արմենուհի Մխոյան. Տարեդարձին նվիրված տոնական համերգին, որն անցկացվեց Գյումրու Վարդան Աճեմյանի անվան պետական դրամատիկական թատրոնում, ներկա էին դիվանագիտական կորպուսի, երկու երկրների ուժային կառույցների, Շիրակի մարզպետարանի և Գյումրու քաղաքապետարանի ներկայացուցիչները: Միջոցառման մեկնարկն ազդարարվեց ՌԴ և ՀՀ հիմներով:
Օրվա խորհրդով պայմանավորված, միջոցառումը պարգևներով ու նվերներով առատ էր՝ տարբեր աստիճանի շքանշաններով պարգևատրվեցին ինչպես ռազմակայանի` Սիրիայում աչքի ընկած զինծառայողները, այնպես էլ 2017 թվականին մարտական պատրաստականության պարապմունքների ընթացքում աչքի ընկած հրամանատարներն և լավագույն զինծառայողները: Իսկ պարգևերն ոչ միայն հրամանատարությունից էին, պարգևներ կային նաև ՌԴ Պաշտպանության նախարարությունից:
102-րդ ռազմակայանը ևս արժանացավ մի շարք նվերների ու պարգևների ինչպես ՌԴ ԶՈՒ, այնպես էլ Շիրակի մարզպետարանի ու Գյումրու քաղաքապետարանի կողմից: ՌԴ պաշտպանության բանակի անունից շնորհավորանք հղեց նաև Հայաստանում ՌԴ դեսպանատան զինվորական ատաշե գեներալ-մայոր Եվգենի Բուլավինցևը:
«1941 թվականի դեկտեմբերի 29-ին Սվերդլովսկի մարզի Աչիտ գյուղի մոտակայքում ձևավորվեց 435-րդ հրաձգային դիվիզիայի 1415-րդ հրաձգային գունդը, որի էլ իրավահաջորդը 102 ռազմական բազան է: Հայրենական Մեծ պատերազմի ընթացքում գունդն ավելի քան 5000 կմ մարտական ուղի է անցել` ազատագրելով ավելի քան 170 բնակավայր։ Դիվիզիայի ավելի քան 2000 սպաներ և զինվորների պարգևատրվել են շքանշաններով ու մեդալներով»,-ներկայացնելով 102-ի ուղին` նշեց Հայաստանում 102-րդ ռազմական բազայի հրամանատար գնդապետ Վլադիմիր Ելկանովը՝ հավելելով, որ ԽՍՀՄ Գերագույն Խորհրդի Հրամանագրով՝ գերմանա-ֆաշիստական զավթիչներից Վիտեբսկ քաղաքն ազատագրելու ճակատամարտերի ժամանակ հրամանատարության առաջադրանքները լավագույնս կատարելու համար գունդը պարգևատրվել է Ալեքսանդր Նևսկու շքանշանով:
Միավորոմը Հայաստանում վերատեղաբաշխվել է 1946 թվականի հունվարից, իսկ գունդը՝ 1957–ից: 2001 թվականի հուլիսի 1-ից միավորումը մտել է Ռուսաստանի Դաշնության և Հայաստանի Հանրապետության զինված ուժերի Միավորված Խմբավորման զորքերի (ուժերի) կազմի մեջ: 2009-ի օգոստոսի 1-ից գունդը վերաձևավորվել է 73 առանձին մոտոհրաձգային բրիգադի, ապա 2010 թվականի մայիսին վերանվանվել Ալեքսանդր Նևսկու շքանշանակիր 102-րդ ռազմակայանի: 2009-ի նոյեմբերի 14-ին ռազմաբազային շնորհվել է նոր նմուշի Մարտական Դրոշ:
Հայ-ռուսական միացյալ զորախմբի մասին համաձայնագիրը Հայաստանի անվտանգության երաշխիքն է արտաքին սպառնալիքներից: Հայ-ռուսական ռազմավարական հարաբերությունները զարգանում են, իսկ Գյումրիում տեղակայված ռուսական ռազմաբազան պաշտպանում է Հայաստանի անվտանգությունը. սա փաստում էին ներկաներից շատերը:
Օրվա ընթացքում շատ մաղթանքներ ու ցանկություններ հնչեցին, սակայն հիմնականը մեկն էր՝ խաղաղություն ու կայունություն: Զինընկերներին շնորհավորեցին նաև Գյումրու կայազորի հրամանատարը, 102-րդ ռազմաբազայի վետերանները:
Տոնի առթիվ կազմակերպվել էր նաև տոնական համերգ:
Հայաստանի հյուսիսում՝ Գյումրի քաղաքում տեղակայված 102-րդ ռազմակայանը, մարտական հերթապահություն է իրականացնում ԱՊՀ մասնակից պետությունների ՀՕՊ Միավորված համակարգի շրջանակներում: 2010-ի օգոստոսի 20-ին բազայի տեղակայման մասին պայմանագրի գործողության ժամկետը երկարաձգել է մինչև 2044 թվականը. արձանագրությունը նախատեսում է նաև ընդլայնել աշխարհագրական եւ ռազմավարական պատասխանատվությունը: Բազան հագեցած է ԶՀՀ-300В, Բուկ Մ1-2, Միգ-29 կործանիչներով, Մի-8МТ կարգի ռազմա-տրանսպորտային ուղղաթիռներով և հարվածային Մի-24Պ-ով:
