ԵՐԵՎԱՆ, 28 դեկտեմբերի — Sputnik. Հայաստանի հիվանդանոցներում և դպրոցներում կարգելվի նախընտրական քարոզչությունը։ Ընտրական օրենսգրքի համապատասխան փոփոխությունների նախագիծը հաստատվեց դեկտեմբերի 28-ին կառավարության նիստում։ Կարգելվի քարոզել պետական հաստատություններում և ձեռնարկություններում (բոլոր այն ձեռնարկություններում, որտեղ պետության կամ քաղաքապետարանի մասնաբաժինը 20% և ավելի է կազմում)։
Օրինագծի համաձայն` աշխատանքային ժամերին արգելվում է ցանկացած տեսակի թռուցիկների, քարոզչական նյութերի տարածումը կամ քարոզչության նպատակով ծառայողական բյուջեի կամ տարածքի օգտագործումը։
Նույն արգելքը կտարածվի նաև ուժային կառույցների աշխատակիցների և իրավապահների վրա` դատավորներ, դատախազներ, քննիչներ, բանտի ադմինիստրացիա։ Բացի այդ, արգելքը կգործի նաև բարեգործական և միջազգային կազմակերպությունների ներկայացուցիչների համար։
Նշված կանոնները խախտելու համար հասարակ աշխատողները ստիպված կլինեն 100-400 հազար դրամ տուգանք վճարել, իսկ պաշտոնատար անձինք` 200-800 հազար։
Բարձրաստիճան պաշտոնյաներից միայն նրանք կարող են քարոզել, ովքեր ներգրավված են ընտրական գործընթացում` պատգամավորներ, քաղաքների և գյուղերի վարչակազմների ղեկավարներ, ինչպես նաև Ավագանու անդամներ։ Սակայն նաև այդ դեպքում նրանք չեն կարող օգտագործել իրենց վարչական ռեսուրսները։
Նկատենք, որ օրինագիծն ընդունվում է 2017 թվականի խորհրդարանական ընտրություններից կես տարի անց։ Իսկ քանի որ նախագահական ընտրությունները 2018 թվականին այլևս չեն լինի, այս փոփոխությունները կգործեն միայն հաջորդ խորհրդարանական ընտրությունների ժամանակ` հինգ տարի հետո։
