ԵՐԵՎԱՆ, 28 դեկտեմբերի — Sputnik. Բաքվի դպրոցներից մեկի անգլերենի ուսուցիչ Ռովշան Ազիզովը զրկվել է աշխատանքից «հայամետ» դիրքորոշման պատճառով, հայտնում են ադրբեջանական լրատվամիջոցները։
Ազիզովն Ադրբեջանի ու Հայաստանի միջև խաղաղության կողմնակից է ու երկու երկրների և ժողովուրդների հաշտության գաղափարը փոխանցում էր նաև իր աշակերտներին։ Այդ պատճառով էլ նրան հեռացրել են աշխատանքից։
Ազիմովն ադրբեջանական լրատվամիջոցներին հայտնել է, որ հատուկ տեսահոլովակներ է պատրաստել աշակերտներին ցույց տալու համար։
Նա նշել է, որ իր հեռացման կապակցությամբ խնդրել է ուսուցչական խորհուրդ հրավիրել, բայց նրա խնդրանքը մերժել են։
Համացանցում տեղեկություն է հրապարակվել նաև այն մասին, որ Ազիզովը ադրբեջանցի աղջկան հայկական տարազ է հագցրել ու լուսանկարել Բաքվի իբր հայկական եկեղեցու ֆոնին` այդ լուսանկարն անձնական նամակով ուղարկելով սոցիալական ցանցի ընկերներից մեկին։ Facebook-ում նրա անունից այդ լուսանկարը տարածում են այլ օգտատերերը` նրա արարքն «ազգի դավաճանություն» որակելով։
Նշվում է նաև, որ ավելի վաղ սոցիալական կայքերում բողոքել են այդ ուսուցչից` նշելով, որ նա աշակերտներին դաստիարակում է «հայերին սիրելու ոգով»։
